وێنه:فێستیڤاڵی باسكه‌ی كچانی سلێمانی كۆتایی هاتوو خه‌ڵات به‌سه‌ر سه‌رجه‌م تیپه‌كان دابه‌شكرا
دیمەنێک لە پاڵەوانێتیەکە
ئه‌رده‌ڵان محه‌مه‌د – SNNsport
ركابه‌رییه‌كانی پاڵه‌وانێتیی باسكه‌ی كچانی منداڵانی یانه‌كانی سلێمانی و ده‌وروبه‌ری كه چوار تیپ به‌شداربوون كۆتایی هاتوو دوای ته‌واوبوونی یاریه‌كانیش خه‌ڵات به‌سه‌ر سه‌رجه‌م یاریزانان و تیپه به‌شداربووه‌كان دابه‌شكرا.
به‌ڕێوەبه‌رایه‌تی وه‌رزشی سلێمانی به هاوكاری لقی سلێمانی یه‌كێتیی باسكه‌ی عێراق پاڵه‌وانێتیی باسكه‌ی كچانی منداڵانی بۆ ماوه‌ی 3 رۆژ ئه‌نجامدا و دوای ماوه‌یه‌كی زۆریش منداڵان به خول و پاڵه‌وانێتیه‌كان شاد بوونه‌وه.
یارییه‌كانی پاڵه‌وانێتیه‌كه به شێوازی خول ئه‌نجامدراو هه‌ریه‌ك له كچانی هه‌ڵه‌بجه‌ی شه‌هید ، ده‌ربه‌ندیخان ، رێكخراوی ژیما و ئه‌كادیمیای خه‌ونی وه‌رزشی به‌شداربوون، دوای سێ رۆژ ركابه‌ری به ئه‌نجامدانی دوو یاری ركابه‌رییه‌كان كۆتایی هات.
له یاری یه‌كه‌مدا هه‌ردوو رێكخراوی ژیما و هه‌ڵه‌بجه‌ی شه‌هید به‌یه‌كگه‌یشتن، دوای یارییه‌كی به‌هێز كچانی هه‌ڵه‌بجه‌ی شه‌هید توانی یاریه‌كه به ئه‌نجامی ( 30-16 ) خاڵ به‌سوودی خۆی كۆتایی پێ بێنێت .
له یاری دووه‌میشدا كچانی ده‌ربه‌ندیخان رووبه‌ڕووی ئه‌كادیمیای خه‌ونی وه‌رزشی بوویه‌وه، یاریه‌كه به به‌هێزی یاریزانانی هه‌ردوو تیپ ده‌ستیپێكرد، به‌ڵام شاره‌زایی و لێهاتووی یاریزانانی ئه‌كادیمیای خه‌ونی وه‌رزشی وایكرد كه له یاریه‌كه باڵا ده‌ست بێت و یاریه‌كه‌ش به‌جیاوازییه‌كی زۆر به سوودی خۆی كۆتایی پێ بێنێت به ئه‌نجامی (45-17) خاڵ.
بیلال مه‌ولود سكرتێری باسكه‌ی سلێمانی ئاماژه‌ی به‌وه‌دا:” ئامانجمان له ئه‌نجامدانی ئه‌م پاڵه‌وانێتییه گرنگیدانه به منداڵان، له‌به‌رئه‌وه‌ی ماوه‌یه‌كی زۆره پاڵه‌وانێتیان بۆ ئه‌نجام نه‌دراوه، بۆیه ئێمه‌ش ده‌مانه‌وێت له‌سه‌ر كردنه‌وه‌ی خول و پاڵه‌وانێتییه‌كانمان به‌رده‌وام بین، چونكه چه‌ندین یاریزانی به‌هره‌مه‌ندی تێدایه كه ده‌توانین سوودی لێ ببینین بۆ دواڕۆژی شاری سلێمانی”.
له‌لای خۆیه‌وه رزگار محه‌مه‌د راهێنه‌ری ئه‌كادیمیای خه‌ونی وه‌رزشی وتی:” كردنه‌وه‌ی ئه‌م جۆره خولانه به تایبه‌تی بۆ ئه‌م ئاسته‌ی كچان زۆر گرنگه، چونكه له ئێستادا له‌سه‌ر ئاستی كوردستان و ته‌نانه‌ت عێراقیش خول و پاڵه‌وانێتییه‌كان وه‌ستاوه هیچ چالاكییه‌ك نیه، بۆیه له‌م كاته‌دا و دوای ئه‌و ماوه زۆره‌ی هیچ چالاكییه‌ك نه‌بوو ئه‌م پاڵه‌وانێتییه زۆر گرنگ بوو بۆ ئه‌م ئاسته‌ی كچان”.
ئاماژه‌ی به‌وه‌شدا:” چه‌ندی یاریزانی به‌هره‌مه‌ندمان هه‌یه كه له‌م خول و پاڵه‌وانێتیانه‌دا ده‌توانن ئاستی خۆیان پیشان بده‌ن و بۆ داهاتووی ئه‌م شاره و هه‌ڵبژارده‌ی عێراق سوودی لێ ببینین”.
دوای ته‌واوبوونی یاریه‌كانیش له‌لایه‌ن به‌رپرسانی به‌ڕێوەبه‌رایه‌تی وه‌رزشی سلێمانی و باسكه‌ی سلێمانی و دایك و باوكی یاریزانه به‌شداربووه‌كان خه‌ڵات به‌سه‌ر یاریزانان و هه‌ر چوار تیپی به‌شداربوو دابه‌شكرا.
