رێژەی سەوزایی لە گەرمیان زۆر کەمە؛ بڕینەوەی داریش بەردەوامە
-SNNسیروان حه‌سه‌ن
له سنوورى گه‌رمیان رێژه‌ى سه‌وزایى نزیكه‌ى %8ە، به وته‌ى چالاكوانانى ژینگه رێژه‌كه زۆر كه‌مه، بۆ ئه‌و مه‌به‌سته ئه‌مرۆ هه‌ڵمه‌تێكی نەمام چاندنیان له گه‌ڕه‌كێكى تازه‌ى شارى كه‌لار ده‌ستپێكردووه و هه‌زار نه‌مامى تێدا ده‌چێنن.
ئازاد ئه‌حمه‌د سه‌رۆكى رێكخراوى ژینگه دۆستى گه‌رمیان به SNNى راگه‌یاند: ئه‌مرۆ له گوندى لانه سیتى كه یه‌كێكه له گه‌ره‌كه نوێیه‌كانى شارى كه‌لار و هیچ دارو سه‌وزاییه‌كى تێدایه نییه هه‌ڵمه‌تێكیان ئه‌نجامداوه و تێیدا یه‌ك هه‌زار نه‌مان ده‌نێژن.
وتیشى: له سنوورى گه‌رمیان رێژه‌ى سه‌وزایى كه‌مه و ناگاته هه‌شت له سه‌د، له‌گه‌ڵ ئه‌وه‌شدا هه‌ندێك گرفتى ژینگه‌یى هه‌ن له‌وانه بڕینه‌وه‌ى دار و تێكدانى ژینگه کە له هه‌ندێك شوێن و ناوچه به‌رده‌وامى هه‌یه.
ئازاد ئه‌حمه‌د ئاماژه‌ى به‌وه‌شدا: له گه‌ڵ ناشتى هه‌ر نه‌مامێك كارگه‌یه‌كى ئوكسجین و هه‌واى پاك بۆ هه‌مووان دابینده‌كرێت به بێ جیاوازى و پێویسته ئه‌وانه‌شى زیان به ژینگه ده‌گه‌یه‌نن چیتر واز له‌و كرده‌وانه بێنن. هه‌روه‌ها لایه‌نى په‌یوه‌ندیداریش زیاتر چاودێرى سنووره‌كه بكه‌ن و سه‌رپێچیكاران سزابده‌ن.
