ئومێد خۆشناو و هێمن قادر كاندیدی بەهێزن بۆ شوێنی فرسەت سۆفی

SNN
دوای گیانلەدەستدانی فرسەت سۆفی پارێزگاری هەولێر، هەریەكە لە ئومێد خۆشناو پەرلەمانتاری پارتی و هێمن قادر جێگری پارێزگار پاڵێوراون بۆ بوون بە پارێزگار، بڕیاری یکلاکەرەوەش لای مەسعود بارزانی-ە.

رۆژی 17ی ئەم مانگە فرسەت سۆفی پارێزگاری هەولێر لە ئەنقەری پایتەخی توركیا بە کۆرۆنا گیانیلەدەستدا و رۆژی 19ی11 تەرمەكەی هێنرایەوە هەولێر و لە گۆرستانی شێخ ئەحمەد لە شاری هەولێر بە خاكسپێردرا.

لەگەڵ تووشبوونی فرسەت سۆفی-ش بە ڤایرۆسی كۆرۆنا، هێمن قادر جێگری پارێزگاری هەولێر بۆ كاروباری ئیداری كارەكانی ئەوی راییدەكرد .

بەپێی زانیارییەكانی SNN لە ئێستادا ئومێد خۆشناو و هێمن قادر كاندیدی بەهێزن بۆ وەگرتنی پۆستی پارێزگاری هەولێر، بەڵام چانسی زیاتر بۆ هێمن قادر-ە، چونكە لە ماوەی رابردوو دەنگۆی وەگرتنی پۆستی بەرپرسی لقی دوو لەلایەن ئومێد خۆشناو هەبووە .

سەرەتای ئەمساڵ چەندینجار دەنگۆی وازهێنانی ئومێد خۆشناو لە پۆستی پەرلەمانتاریی و بوونی بە بەرپرسی لقی دوو هەبوو و دواتر ناوبراو وتی: “من بەهیچ شێوەیەك ئاگاداری ئەو بابەتە نیم” ئێستاش دوای مردنی فرسەت سۆفی جارێكیتر دەنگۆی بوونی ئومێد خۆشناو بە پارێزگاری هەولێر بڵاو بووەتەوە.

تاوەكو ئێستا ئومێد خۆشناو هیچ روونكردنەوەیەكی لەسەر ئەو دەنگۆیانە بڵاو نەكردووەتەوە و SNNزۆر هەوڵیدا پەیوەندی بە ناوبراوەوە بكات، بەڵام پەیوەندییەكان بەردەست نەبوون .

هەر بەپێی زانیارییەكانی SNN پۆستی پارێزگاری هەولێر لەنێوان هێمن قادر و ئومێد خۆشناودا دواجار مەكتەبی سیاسیی و مەسعود بارزانی سەرۆكی پارتی دیموكراتی كوردستان یەكلاییدەكەنەوە، چونكە لە ماوەی رابردووش هەر بەمشێوەیە پۆستەكان یەكلا بوونەتەوە .