لە ئێوارەی ئەمڕۆوە چەند فڕۆکەیەک بە ئاسمانی هەولێردا دەسوڕێنەوە

SNN– بریار محەمەد

لە ئێوارەی ئەمڕۆوە ژمارەیەک فڕۆکە بە ئاسمانی شاری هەولێردا دەسوڕێنەوە کە ئەوەش دڵەڕاوکێی لای بەشێک لە هاووڵاتیان دروستکردبوو، بەڕێوەبەری فڕۆکەخانەی هەولێریش دەڵێت: فڕۆکەکان سەر بە هێزەکانی هاوپەیمانانن.

بەڕێوەبەری فرۆكەخانەی نێودەڵەوتی هەولێر لە لێدوانێکیدا بۆ SNN رایدەگەیەنێت: لە ئێوارەی ئەمڕۆوە هێزەكانی هاوپەیمانان ئۆپراسیۆنی تایبەتی خۆیان بەڕێوەدەبەن بە بەرزی ١٨ هەزار پێ دەسوڕێنەوە، هیچ مەترسیەكیش لەسەر هەولێر نییە و فڕینی ئەو فرۆكانەش بە تەنها لە ئاسمانی هەولێر نییە  .
ئەحمەد وشیار ئاماژەی بەوەکرد: دیارە لە ئێوارەوە دڵەڕاوکێ لای هاووڵاتیان دروستبووە، بەهۆی دەنگی فرۆكە لە ئاسمانی  هەولێر لێرەوە بە هەموو خەڵكی رادەگەیەنین كەوا هیچ مەترسیەك لەسەر هەولێر نییە و ئەوەی هەیە تەنها ئۆپراسیۆنی هێزەكانی هاوپەیمانانە.
وتیشی: فڕینی ئەو فرۆكانە لە دەسەڵاتی ئێمەدا نییەوە و پەیوەندی بە بەڕێوەبەرایەتییەکەمانەوە نییە، تەواوی دەسەڵاتی فرینی ئەو فرۆكانەش لە دەسەڵاتی  عێراقە و ئەو فرۆكانەش بە تەنها لەسەر ئاسمانی هەولێردانییە و بەڵکو لە ئاسمانی چەند شارێکی دیکەشدا دەسوڕێنەوە.

ئەو ئۆپراسیۆنەی هێزەكانی هاوپەیمانان لە كاتێکدایە كە جموججۆڵەكانی داعش لە سنورەكانی كەركوك و مەخمور و  دیالە زیادی كردوە و ئەو ئۆپراسیۆنە هاوپەیمانانیش پەیوەندی بەو جموجۆڵانەی داعش هەیە لەو سنوورانەدا .