وەزارەتی كارەبا لە ئێستادا توانای پێدانی 11 بۆ 13 كاتژمێر کارەبای هەیە

SNN- بڕیار محەمەد
وتەبێژی وەزارەتی كارەبای هەرێم ئاشكرایدەكات لە ئێستادا بەهۆی خواستی زۆری كارەبا لەلایەن هاووڵاتیانەوە دەتوانن كارەبای نیشتمانی لەنێوان 11 بۆ 13 كاتژمێر بدەنە هاووڵاتیان و بۆ سەرەتای وەزری زستانیش پلانی تریان دەبێت.

ئومێد محەمەد وتەبێژی وەزارەتی كارەبای حكومەتی هەرێمی كوردستان بەSNNی راگەیاند “ئێمە وەكو وەزارەتی كارەبای هەرێم بەردەوام لەهەوڵداین بۆ زیادكردنی بەرهەمهێنانی كارەبا، چونکە بەردەوام خواستی خەڵك زیاتر دەبێت بۆ كارەبا، بۆیە لە ئێستادا دەتوانین رۆژانە كارەبای نیشتمانی لە نێوان 11 بۆ 13 كاتژمێر بدەینە هاووڵاتیان” .

وتیشی: “لە كۆتایی ئەمساڵ و دەستپێکی ساڵی نوێ و سەرەتای دەستپێكردنی وەزری سەرما وەزارەتی كارەبا كۆدەبێتەوە بڕیار لەسەر پێدانی كاتژمێرەكانی كارەبای نیشتمانی دەدات، بەڵام لە ئێستادا و تا كۆتایی ئەمساڵ بەو شیێوەیەی ئێستا دەبێت”.
ئەوەشی خستەڕوو “سبەینێ پڕۆژەی دەرهێنانی هەشت فیدەری 11 كەی ڤی لە وێستگەی 132 كەی ڤی كەسنەزان جێبەجێدەكرێت، ئەو پرۆژەیەش یارمەتیدەر دەبێت بۆ چاکكردنەوەی ئەو شوێنانەی ڤیدەركانیان كێشەی هەبوو لە داهاتووش پلانی چاکكردنەوەی تەواوی ئەو ڤیدەرانە هەیە كە كێشەیان هەیە” .