كەشناسی سلێمانی: هیچ ئەگەرێك نییە ئەمساڵ وشكەساڵی رووبدات

SNN-عەلی حەمە سەعید
بەڕێوەبەری كەشناسی و بومەلەرزەزانی سلیمانی ئاماژە بەوەدەكات لەمساڵدا بڕی 226.4 ملم باران باریوە لە كاتێكدا ساڵی ڕابردوو لەم كاتەدا 233 ملم باران باریوە، ئەمەش ڕێژەیەكی كەم نییە و هێشتا سەرەتای وەرزی زستانە و وەرزی بەهاریشمان لەبەردەمدا ماوە لەكاتێكدا ساڵانە تەنها لە %15 بڕی باران لە وەرزی پایزدا دەبێت لە %85 باران بارینش لەو دوو وەرزەدا دەبێت، بۆیە هیچ ئەگەرێك نییە لە ئێستاوە بڵێین ئەمساڵ وشكەساڵی دەبێت.

ئاسۆ كەمال، بەرێوەبەری كەشناسی و بومەلەرزەزانی سلێمانی SNNی ڕاگەیاند: ساڵانە بڕی باران بارین بەسەر سێ‌ وەرزی ساڵ دابەش دەبێت، بە جۆرێك لە وەرزی پایز نزیكەی لە %15 باران بارین و لە وەرزی زستان لە %50 و هەروەها لە وەرزی بەهاریش لە %35 بڕی باران دەبارێت، بۆیە لە ئێستادا كە لە سەرەتای وەرزی زستانداین و هەروەها بڕێكی باشیش باران لە وەرزی پایز باریوە و وەرزی بەهاریشمان لەبەردەمدا ماوە بۆیە هێشتا زۆر زووە لە ئێستاوە بڵێین ئەمساڵ وشكەساڵی روودەدات.

ئاماژەی بەوەشكرد: ساڵی ڕابردوو لەم كاتەدا 233 ملم باران باریبوو، لەمساڵیشدا تا ئێستا بڕی 226،4 ملم باران باریوە، جیاوازییەكی زۆر كەم لە بڕی باران بارینی ئەمساڵ و ساڵی ڕابردوو هەیە، بۆیە سروشتی بارانبارین لە وەرزە جیاوازەكاندا بەجۆرێكە هەندێك جار بۆماوەی چەند ڕۆژێك بەسەریەكەوە باران نابارێت، بەڵام دواتر بۆ ماوەیەكی زۆر باران بارین بەردەوامی دەبیێت و قەرەبووی ئەو كاتانەش دەكاتەوە كە بارانی لێنەباریوە.

بەرێوەبەری كەشناسی و بومەلەرزەزانی ئەوەشی خستەڕوو، بە شێوەیەكی گشتی لە سنووری پارێزگای سلێمانی بەتایبەت لە سنوری قەزاكانی پێنجوێن و بەرزنجە و بازیان و چوارتا بڕی پێویستی باران داباریوە، بۆیە هاووڵاتیان و جوتیاران و خاوەن كێڵگە كشتوكاڵییەكان دڵنیا دەكەینەوە كە هیچ ئەگەرێك نییە بڵێین ئەمساڵ وشكەساڵی ڕوودەدات.