دوایین زانیاری لەبارەی گفتوگۆکانی نێوان هەرێم و بەغدا

SNN
ئەندامێکى لیژنەى دارایى لە پەرلەمانی عێراق رایدەگەنێت”گفتوگۆ لە بارەى پرۆژە یاساى بودجە بەردەوامى هەیە و سوونەکان بە فەرمى رایانگەیاندووە کە هەر دەقێک کورد پێشنیارى بکات ئێمە پشتیوانى لێدەکەین و هەرچى کوتلەى شیعەکانیشە ئەمڕۆ پێشنیارى نوێیان پێبوو”.

شیروان میرزا، ئەندامێکى لیژنەى دارایى لە ئەنجومەنى نوێنەرانى عیراق بە SNNى رایگەیاند” کەمێک پێش ئێستا کۆبونەوەى لیژنەى دارایى کۆتاى هات و بڕیارە سبەى دیسانەوەى لیژنەکە کۆببێتەوە سەبارەت بە پرۆژەیاساى بودجەى ساڵى 2021، ئەوەى ئێمە هەوڵى بۆ دەدەین جێگریکردن و دیارکردنى پشکى کوردە لە نێو پرۆژەکەدا”.

وتیشى: “ئێوارەى ئەمڕۆ شاندى حکومەتى هەرێمى کوردستان گەشتونەتە بەغدا، بڕیارە چەند دیدار کۆبونەوەیەک ئەنجام بدەن، ئەگەرچى من بەرنامەى کارەکەیان نازانم بەڵام پێشبینى دەکەم پێشنیارى نوێیان پێبێت خۆ ئەگەر پلان و پێشنیارى نوێیان پێنەبوایە ئەوا شاندەکە نەدەهاتنەوە بۆ بەغدا”.

هاوکات ئاماژەى بەوەش کرد: “بەهیواین حکومەتى ناوەند و هەرێم بگەنە رێککەوتن لەسەر پرۆژە یاساى بودجە تاوەکو دەست نەبرێت بۆ زۆرینە و کەمینە بۆ تێپەڕاندنى پرۆژە یاساکە لە نێو هۆڵى پەرلەماندا”.