بافڵ تاڵەبانی: رێگە بە کەس نادرێت ئاستەنگ بۆ دەزگای دەستپاکی و چاودێری دارایی یەکێتیی دروستبکات

SNN

هاوسەرۆکی یەکێتیی نیشتمانیی کوردستان رایدەگەیەنێت “رێگە بە هیچ کەسێک نادرێت ئاستەنگ لەبەردەم کارەکانی دەزگای دەستپاکی و چاودێری دارایی یەکێتیی دروستبکات”

بافڵ تاڵەبانی جەختیشدەکاتەوە “دەزگاکە رۆڵێکی گرنگی هەیە لە بەگژداچوونەوەی گەندەڵی دارایی و ئیداریی و هەروەها پارێزگاری لە دارایی گشتی”.

بافڵ تاڵەبانی، ھاوسەرۆکی یەکێتیی نیشتمانیی کوردستان ئەمڕۆ چوارشەممە لە دەباشان لەگەڵ دەزگای دەستپاکی و چاودێری دارایی یەکێتی کۆبووە.

لە دەستپێکی کۆبوونەوەکەدا فەوزیە نەزیف سابیر، لێپرسراوی دەزگای دەستپاکی و چاودێری دارایی راپۆرتێکی لەسەر کار و ئەرکی چەند مانگی دەستبەکاربوونیانی پێشکەشکرد و لەسەر چۆنییەتی چاودێریکردنی داھات و خەرجییەکان زانیاری خستەڕوو.

لەبەرامبەردا بافڵ تاڵەبانی جەختیکردەوە دەزگاکە رۆڵێکی گرنگی هەیە لە بەگژداچوونەوەی گەندەڵی دارایی و ئیداریی و هەروەها پارێزگاری لە دارایی گشتی.

هاوسەرۆک هەموو پشتیوانییەکی بۆ دەزگاکە دووپاتکردەوە و رایگەیاند، هەموو دەسەڵاتێکی چاودێری و کارگێڕیتان هەیە، سەربەخۆ و دادگەرانە کاربکەن و رێگە بە هیچ کەسێکیش نادرێت ئاستەنگ لەبەردەم کارەکانتان دروستبکات.