کۆشکی سپی: بەمنزیکانە راپۆرتی کوژرانی جەمال خاشقچی بڵاودەکەینەوە

SNN

کۆشکی سپی رایدەگەیەنێت “لە نزیکترین کاتدا راپۆرتی هەواڵگریی کوژرانی رۆژنامەنووسی سعودی جەمال خاشقچی بڵاو دەکەینەوە”.

کۆشکی سپی لە راگەیەنراوێکدا ئەمڕۆ چوارشەممە ئەوەشی ئاماژە پێداوە “ناوەڕۆکی گفتوگۆی تەلەفۆنیی جۆو بایدن و شای سعودیەش بڵاودەکەنە کە ئەویش بەمنزیکانە ئەنجامدەدرێت”.

جین پساکی وتەبێژی کۆشکی سپی لە کۆنگرەیەکی رۆژنامەوانیدا وتی: “دوای وەرگرتنی رەزامەندی و هەڵگرتنی نهێنییەکان لەسەر بڵاوکردنەوەی، بەمنزیکانە راپۆرتی کوشتنی خاشقچی ئاشکرا دەکرێت”.

جەمال خاشقچی، رۆژنامەڤان و کۆنە بەرپرسی سعودیە لە رۆژی 2ی ئۆکتۆبەری 2018 لە نێو کونسوڵخانەی سعودیە لە ئیستەنبوڵ کوژرا.

سەرەتا بەرپرسانی سعودیە نکۆڵیان لەوە دەکرد کە خاشقچی لە نێو کونسوڵخانەی ئەواندا کوژرابێت، بەڵام سێ هەفتە دوای دیارنەمانی خاشقچی دواجار سعوودییەکان دانیان بەوەدا نا کە رۆژنامەنووسەکە لە کونسوڵخانە کوژراوە.

ئەوکات میدیای فەرمی سعودیە رایگەیاند جەمال خاشقچی لە ئاکامی شەڕ لەگەڵ ستافی ناو کۆنسوڵخانەکە کوژراوە، شا سەلمان بڕیاری لادانی ئەحمەد ئەسیری، جێگیری سەرۆکی هەواڵگری سعودیە و سعود ئەلقەحتانی، راوێژکاری خۆی دەرکرد.

جیا لەمە 18 کەسیش دەستگیرکران کە 15 کەسیان ئەوانەن گومان دەکرا بۆ کوشتنی خاشقچی رەوانە کرابن، دووانیان ستافی کۆنسوڵخانە و یەکێکی دیکەیان شوفێری کۆنسوڵخانە بوو.