سێ هۆکاری سەرەکی پەسەند کردنی بودجەی دواخستووە

SNN

جێگری سەرۆکی فراکسیۆنی پارتی لە پەرلەمانی عێراق دەڵێت: “ئەو رێککەوتنەی کرا لەنێوان هەرێم و بەغدا، لەسەر پێشنیازی شیعەکان بوو، کە بووە بەدیلی پێشنیازەکەی حکومەت و هەرێمیش بە دڵێکی پاکەوە قبوڵی کرد”.

بەشار کیکی لە وەڵامی پرسیارێکی SNNدا وتی: “لەکاتی بە چاپگەیاندنی سیغەی رێککەوتنەکەدا بەرەبەیانی رۆژی هەینی گۆڕانکاری تێدا کرا و پێچەوانە بوو لەسەرئەو داڕشتنەی رێککەوتنی لەسەر کرا”.

وتیشی: “ئەم هەڵوێستەی شیعەکان بێڕێزیی بوو بەرامبەر بە بەڵێن و ئیمزای خۆیان و پاشگەز بوونەوە بوو لە ناوەڕۆکی رێککەوتنەکە کە لە ئەسڵدا لەسەر پێشنیازی ئەوان وەفدی هەرێم بە دڵێکی پاکەوە وەریگرت و رازی بوو لەسەری”.

جێگری سەرۆكی فراكسیۆنی پارتی ئەوەشی راگەیاند، سەرۆكایەتی پەرلەمان و سەرۆكی فراكسیۆنە شیعەكان لەكاتی پیرۆزبایی نەورۆز جەختیان كردووەتەوە ئەو گۆڕانكارییانە كار ناكاتە سەر بنەڕەتی رێككەوتنەكە و دەكرێت بەبێ هیچ بەربەستێک چارەسەر بكرێن.

ئەمڕۆ دووشەممە رۆژنامەی سەباحی فەرمی بڵاویكردەوە سێ هۆكاری سەرەكی لەپشت دواخستنی دەنگدانەوە بوون لەسەر بودجەی 2021 و دەڵێت “شاندی کوردی ویستویانە حساباتی نەوت ساڵانە بێت نەك مانگانە، ئەوەش بەدڵی سەرۆكایەتی پەرلەمان نەبووە و بەم هۆیەشەوە وەفدەكە تەلاری پەرلەمانیان بەجێهێشتووە، هۆکاری دووەمیش تانەی لیستی فەتح بووە لە پێدانی ئیمتیازاتی دارایی بە ئاوارەبووەكانی خێوەتگای ڕەفحا و سێیەم هۆكاریش ناكۆكی و مشتومڕ بووە لەسەر نرخی دۆلار.

لە رێککەوتنەکەی شاندی هەرێمی کوردستان و لایەنە شیعەکان، حکومەتی هەرێمی کوردستان پابەند کرا بە رادەستکردنی 460 هەزار بەرمیل نەوتی رۆژانە دوای ئەوەی کە خەرجی کۆمپانیاکانی لێدەردەکرێت، ئەوەی دیکەشی کە دەمێنێتەوە دەبێت رادەستی کۆمپانیای سۆمۆ بکرێت و نابێت لە 250 هەزار بەرمیل کەمتر بێت.