حەوتەمین کۆنگرەی ئاک پارتی لە تورکيا بەڕێوەدەچێت

SNN

ئەمڕۆ حەوتەمين کۆنگرەی پارتی داد و گەشەپێدانی تورکيا بە ئامادەبوونی رەجەب تەیب ئەردۆغان سەرۆکی گشتی ئاک پارتی و سەرۆککۆماری تورکیا و کادرانی حزبەکە و میوانان لە پارتە سیاسییەکانی دیکە لە ئەنقەرە بەڕێوەدەچێت.

بەپێی هەواڵی ميدياکانی تورکيا: “حەوتەمین کۆنگرەی گشتی ئاک پارتی لەژێر دروشمی (متمانە و سەقامگیریی لەپێناو تورکیا) بەڕێوەدەچێت، لە کۆنگرەکەدا، ئەردۆغان وتارێک پێشکەش دەکات و نەخشە رێگای پارتەکەیان بۆ هەڵبژاردنەکانی  2023 دەخاتەڕوو.

بڕياريشە، دوای وتارەکەی ئەردۆغان، ئەندامانی کۆنگرە دەنگ بدەن بۆ دووبارە متمانەپێدانەوە بە رەجەب تەیب ئەردۆغان بۆ خولێکی دیکە وەک سەرۆکی ئاک پارتی.

پارتی داد و گەشەپێدان لە 14ی ئابی 2001 دامەزراوە، بۆ یەکەمجار لە ساڵی 2002 بەشداری هەڵبژاردنی پەرلەمانی کرد، لە کۆی   550 کورسی پەرلەمان،  363کورسی بەدەستهێنا، لەوکاتەوە بووە بە حزبی حکومڕانی تورکیا.