قاسم ئەعرەجی: بەگوێرەی رێککەوتنێک بەشێکی زۆری هێزەکانی ئەمریکا لە عێراق دەکشێنەوە

SNN

بەگوێرەی خشتەیەکی کاتی، بەشێکی بەرچاوی هێزەکانی ئەمریکا لەعێراق دەکشێنەوە، بەڵام لە رووی ئەمنی و لۆجیستییەوە هەماههەنگیی بەردەوام دەبێت.

قاسم ئەعرەجی راوێژکاری ئاسایشی نیشتمانیی عێراق لەدوای گفتوگۆی ستراتیژی نێوان ئەمریکا و عێراق لە کۆنگرەیەکی رۆژنامەوانیدا رایگەیاند “لایەنی ئەمریکی بەڵێنیانداوە بەشێکی بەرچاوی هێزەکانیان لەوڵات بکشێننەوە”.

بەوتەی ئەعرەجی رێککەوتن کراوە کە هێزە عێراقییەکان بەرپرسیارێتیی رووبەڕووبوونەوەی داعش دەگرنە ئەستۆ.

بەگوێرەی زانیارییەکان تەوەرێکی گفتوگۆکان باسکردنە لە کشانەوەی بەشێکی دیکەی سەربازانی سوپای ئەمریکا کە لە عێراق جێگیر کراون.

رۆژی 20-ی مانگی ئابی ساڵی پار مستەفا کازمی سەرۆکوەزیرانی عێراق سەردانی واشنتنی کرد و چاوی بە دۆناڵد ترەمپ سەرۆکی ئەوکاتی ئەمریکا کەوت.