کازمی: دەبێت دەستبەجێ لێکۆڵينەوە لە هێرشەکەی هەولێر بکرێت

SNN

سەرۆکوەزیرانی عێراق لەبارەی هێرشەکەی شەوی رابردووی هەولێرەوە پەیامێکی بڵاوکردەوە و تیایدا داوايکرد دەستبەجێ لێکۆڵینەوە بکرێت لە ئەو هێرشە و هێرشەکانی ناوچەکانی دیکە.

“مستەفا کازمی سەرۆک وەزيرانی عێراق لە پەيامیکيدا رايگەياند: “ئاسايشی عێراق لە ئەستۆی حکومەت و هێزە ئەمنييەکانە، ئەم جۆرە هێرشە تيرۆرستيانە کە لەمانگی رەمەزاندا ئەنجامدەدرێت مەبەست لێی تێکدانی ئاسايشی وڵاتە.

کازمی دەشڵێت “کەسانێک هەن هەوڵدەدەن ئاژاوە و پشێوی بنینەوە و ئاسايش و سەقامگيری وڵات تێکبدەن، ئەوەش قوبوڵنەکراوە ئەو کەسانە رووبەڕووی ياسا دەبنەوە”.

لەلايەکی ديکەوە، وەزارەتی دەرەوە تورکيا رايگەياندووە: “سەربازێکی تورکيا لە هێرشی سەر کەمپی بەعشيقە لە باکوری عێراق کوژراوە”.

شەوی رابردوو، دژە تیرۆری کوردستان ئاماژەی بەوەکرد: “کە مووشەکێک ئاراستەی فرۆکەخانەی نێودەوڵەتی هەولێر کراوە”، لای خۆشییەوە پارێزگاری هەولێر رايگەياند: “هێرشە مووشەکییەکە هیچ زیانێکی گیانی نەبووە، هەروەها بەهۆی هێرشەکەوە کونسوڵخانەی ئەمەریکا زەنگی ئاگادارکردنەوەی لێداوە “.

لای خۆشییەوە وەزارەتی ناوخۆی حکومەتی هەرێمی کوردستان رایگەیاند: کە لایەنە پەیوەندیدارەکان راسپێدراون کە بەدواداچوون بۆ سەرچاوەی هێرشەکە بکەن، ئاماژەی بەوەش کردووە دواتر هۆکارو شوێنی هێرشەکە ئاشکرا دەکەین.