بافڵ تاڵەبانی لەگەڵ شاندێکی باڵای ئەمریکا کۆبووەوە
SNN
بافڵ تاڵەبانی، هاوسەرۆکی یەکێتی لەگەڵ شاندێکی باڵای ئەمریکا لە هەولێر کۆبووەوە و تاوتوێی دوایین پێشهاتەکانی هەرێم و عێراق و سوریا کرد.
لەو کۆبوونەوەیەدا ھەڵسەنگاندن بۆ دۆخی گشتی ھەرێم و عێراق و سووریا، پاشماوەکانی داعش و رۆڵی ھێزەکانی ھاوپەیمانان لە سەقامگیری و ئاسایشی ناوچەکە کرا و بەوردی بۆچوونیان لەبارەوە خرایەڕوو.
شاندەکەی ئەمریکا پێکهاتبوون لە دەیڤد براونشتاین، جێگری نێردەی تایبەتی ئەمریکا بۆ سوریا، رۆب واڵەر، کونسوڵی گشتی ئەمریکا لە هەرێمی کوردستان.
بافڵ تاڵەبانی بۆچوون و هەڵوێستی یەکێتی لەبارەی دوایین پێشهات و گۆڕانکارییەکانی هەرێم و عێراق جەختی لە لێکنزیکبوونەوە و هەماهەنگی زیاتری نێوان هێز و لایەنە سیاسییەکان کرد و پەسەندکردنی بودجەی بە هەنگاوێکی ئەرێنی وەسفکرد.
لە درێژەی کۆبوونەوەکەدا پرسی کورد لە رۆژئاوای کوردستان و دۆخی سووریا بەوردی هەڵسەنگێندرا و ھاوسەرۆک ئاشکرایکرد، یەکێتی لەگەڵ گفتوگۆی ھەمەلایەنەدایە بۆ پاراستنی مافەکانی گەلی کورد و بۆ ئەمەش گفتوگۆ و دیالۆگی بە تاکە رێگای چارەسەرکردنی کێشەکان لە قەڵەمدا.
بافڵ تاڵەبانی ئامادەیی یەکێتیی نیشتمانیی کوردستانیشی نیشاندا بۆ دروستکردنی داهاتوویەکی پڕ لە ئاشتی و ئارامی بۆ کوردانی رۆژئاوا و سەرجەم خەڵکی سووریا.
هەماهەنگی و هاریکاری زیاتری نێوان هێزەکانی پێشمەرگە و هاوپەیمانان تەوەرێکی تری کۆبوونەوەکە بوو و هەردوولا لەسەر پاڵپشتی و هاوکاری یەکتر کۆکبوون بۆ زاڵبوون بەسەر کێشە ئەمنییەکان و رووبەرووبوونەوەی پاشماوەکانی تیرۆریستانی داعش.
