پەرلەمانتارێک: بە بێ کۆنتڕۆڵکردنی چەک ئەنجامدانی هەڵبژاردنی پێشوەخت ئەستەم دەبێت

SNN

بەدر زەیادی ئەندامی لیژنەی ئاسایش و بەرگریی لە پەرلەمانی عێراق، رایگەیاند: “کۆنترۆڵنەکردنی چەکی بێ مۆڵەت کاریگەری خراپی لەسەر شەفافیەتی ھەڵبژاردنی پێشوەختە دەبێت”.

بەدر زەیادی لە لێدوانێکی رۆژنامەوانییدا ئاماژەی بەوەکرد: “پێویستە حکومەت، یاسایەکی تایبەت بە کۆنترۆڵکردنی چەکی دەرەوەی یاسا دەربکات، ئەگەر ھەڵگرتنی چەک کۆنترۆڵنەکرێت، ئەوا ئەستەم دەبێت، ھەڵبژاردنی پێشوەختە ئەنجام بدرێت، نەوەک ھەر ئەوە، بەڵکو کردەکانی تیرۆرکردن زیاد دەبێت”.

باسی لەوەشکردووە: “کۆنترۆڵنەکردنی چەکی بێ مۆڵەت کاریگەری خراپی لەسەر شەفافیەتی ھەڵبژاردنی پێشوەختە دەبێت، تەنھا لە رێگای تەوافوق و رێککەوتنەوە، چەک لە دەستی دەوڵەتدا، دەبێت”.

پێشتریش موقتەدا سەدر سەرۆکی رەتی سەدر بابەتی کردنەئامانجی چالاکوانان و رۆژنامەوانانی بەستبوەوە بە نزیکبوونەوە لە هەڵبژاردنی پێشوەختە وداواشی کردبوو حکومەت بکوژانی چالاکوانان و رۆژنامەنوسان بە زووترین کات بباتە بەردەم دادگا.

ئەمەش دوای ئەوە دێت کە لە ماوە دوو رۆژدا چالاکوانێک بە ناوی ئیهاب جەواد وەزنی لە کەربەلا بە تەقەی کەسانی نەناسراو کوژرا و لە دیوانیەش رۆژنامەنوسێک بە ناوی ئەحمەد حەسەن بە سەختی بریندار کرا.

لەدوای خۆپیشاندانەکانی ساڵی 2019ەوە وەک چالاکوانان و رێکخراوەکانی داکۆکیکار لە مافەکانی مرۆڤ باسی لێوەدەکەن، نزیکەی 70 چالاکوان و رۆژنامەنوس لە عێراق کراونەتە ئامانج و لەو ژمارەیە نزیکەی 30 کەسیان کوژراون.