یەکێتی مامۆستایان: داوا لە حکومەت دەکەین کۆتایی بە لێبڕینی موچە بهێنێت

SNN

یەکێتی مامۆستایانی کوردستان لە ساڵیادی دامەزراندنیدا داوای کۆتاییھێنان بە لێبڕینی موچە و گەڕانەوەی موچە پاشەکەوتکراوەکان دەکەن لەگەڵ پەسەندکردنی پڕۆژەیاسای پارێزبەندی مامۆستایان کە سێ ساڵ زیاترە ڕەوانەی پەرلەمانی کوردستان کراوە.

یەکێتی مامۆستایانی کوردستان لەراگەیەنراوێکدا بۆ 59 ساڵەی دامەزراندنی باسی لەوەکردوە: “داوا لە حکومەتی ھەرێمی کوردستان دەکەن کۆتایی بە لێبڕینی نایاسایی موچە بھێنێت و ژمارەی بانکی بۆ سەرجەم مامۆستایان بکاتەوە و موچەی ئەو مانگانەیان بۆ بگەڕێنێتەوە کە نەدراون یان پاشەکەوت کراون”.
راشیگەیاندوە: “داوا دەکەن مامۆستایانی وانەبێژ کە لە ئێستادا بۆشایی دانەمەزراندنی مامۆستایانیان پڕکردوەتەوە، خزمەتیان لە بەرچاو بگیرێت و بە بەردەوامی شایستە داراییەکانیان پێبدرێت و بە گرێبەست یان ھەمیشەیی دایان بمەزرێنن.

یەکێتی مامۆستایان داواش دەکات پلە و موچە بەرزکردنەوە کە لە ساڵی 2015ەوە ڕاگیراوە، دەستپێبکاتەوە.
ئەوەشی خستوەتەڕو: “جەخت دەکەنەوە لە جێبەجێکردنی ڕەشنوسی پارێزبەندی مامۆستایان کە سێ ساڵ زیاترە ڕەوانەی پەرلەمانی کوردستان کراوە. هەروەها داوا دەکەن یاسای چاکسازی دەست بۆ دەرماڵەی مامۆستایان بە گشتی و مامۆستایانی زانکۆ بە تایبەتی نەبرێت و لە یەکخستنی یاسای خانەنشینیش دادپەروەری لەبەرچاو بگیرێت”.