ئیسرائیل و حەماس شەڕیان راگرت

SNN

ئیسرائیل و حەماس دوای 11 رۆژ لە شەڕ و هێرشکردنەسەر بنکە و بارەگاکانی یەکتر، ئەمڕۆ بڕیاریاندا ئاگربەست جێبەجێ بکەن، لە کاتژمێر 2ی سەرلەبەیانییەوە دەچێتە بواری جێبەجێکردنەوە.

لە ئاگربەستەکەدا ئیسرائیل دەستپێشخەری کرد و تاکلایەنە رایگەیاند، سەرچاوەیەک لە نوسینگەی سەرۆکوەزیرانی ئیسرائیل بە میدیاکانی وڵاتەکەی وت کە پێشنیازەکەی میسرییان بۆ ئاگربەست قبوڵکردووە بەبێ هیچ مەرجێک و لە بەرەبەیاندا جێبەجێ دەکرێت.

لەدوای ئەو راگەیەندراوە زەنگی ئاگادارکردنەوەی مووشەکەکانی ئیسرائیل لە باشوور کپکرا.

دواتر ئوساما حەمدان بەرپرسی باڵای حەماس بە میدیای فەرمی بزووتنەوەکەی وت کە دڵنیاییان پێدراوە لەبارەی ئاگربەستەکەوە و وتیشی “شۆڕشەکەمان لەبەردەم هاوکێشەیەکی نوێ و سەرکەوتنێکی نوێدایە” رایگەیاند کە پابەندی ئاگربەست دەبێت.

لەدوای شەڕ و ئاڵۆزییەکانی کەرتی غەزە کە بە سەدان قوربانی لێکەوتەوە، ژمارەیەک وڵاتی زلهێز لەنێویشیاندا ئەمریکا داوای ئاگربەستیان کردبوو.