وەزیری گەنجینەی ئەمریکا: بۆ هەڵگرتنی بەشێکی سزاکان چاوەڕێی هەنگاوی ئێرانین

SNN

وەزیری گەنجینەی ئەمریکا رایگەیاند: “بۆ هەڵگرتنی بەشێک لە سزاکانیان چاوەڕێی هەنگاوی کرداری ئێرانن” و جەختیشی کردەوە: “سەپاندنی سزا رێکارێکی گونجاوە بۆ گۆڕینی هەڵسوکەوتی نەیاران و بەرهەڵستکارانیان”.

جانێت یێڵن وەزیری گەنجینەی ئەمریکا لە کۆبوونەوەیەکی لیژنەی چاودێری ئەنجومەنی نوێنەرانی وڵاتەکەی لەوە وەڵامی پرسیارێکدا لە بارەی سزاکانی سەر ئێران وتی: “ئیدارەی جۆ بایدن سەرۆکی ئەمریکا بەردەوامن لە دانوستانەکانیان بۆ ئەوەی ئێران بگەڕێننەوە بۆ پابەندبوونەکانی بە رێککەوتنی ئەتۆمی”.

وتیشی: “ئەگەر ئێران هەنگاوێکی لەو چەشنە هەڵبگرێت، ئەمریکاش ئامادەیە هەنگاوی هاوشێوە بنێت”.

وەزیری گەنجینەی ئەمریکا روونیشیکردەوە: ” ئەگەر ئێران بە تەواوەتی بگەڕێتەوە بۆ رێککەوتنی ئەتۆمی ساڵی 2015، ئەو کاتە واشنتۆنیش تاوتوێی ئەوە دەکات کە چ بەشێک لە گەمارۆکان لە سەر ئەو وڵاتە هەڵبگرێت، کە گونجاو بێت لەگەڵ هەنگاوەکەی تاران”.

لەبەشێکی دیکەی قسەکانیدا جانێت یێڵن داکۆکی لە سیاسەت سەپاندنی سزا و گەمارۆ کرد و بە کەرەستەیەکی باش ناوی برد بۆ گۆرینی هەڵسوکەوتی ئەو کەس و لایەن و وڵاتانەی لە سیاسەتی دەرەوەی ئەمریکادا بە دوژمن و نەیار پێناسە کراون.

ساڵی 2018 ئەمریکا بە سەرۆکایەتی دۆناڵد ترەمپ لە رێککەوتنی ئەتۆمی کشایەوە و سزاکانی بەسەر ئێراندا سەپاندەوە، لەبەرامبەریشدا تاران بە چەند قۆناغێک تەواوی پابەندبوونەکانی بەو رێککەوتنە هەڵپەسارد و ئاستی پیتاندنی یۆرانیۆمی سەرەتا گەیاندە 20٪ و دواتر بۆ 60٪ بەرزیکردەوە.

لەدوای هاتنەسەرکاری جۆ بایدن سەرۆکی ئەمریکا ئەو وڵاتە خواستی خۆی بۆ گەڕانەوە بۆ رێککەوتنی ئەتۆمی نیشاندا و ماوەی دوو مانگیشە دانوستانی چڕ لە ڤییەنا لە ئارادایە بەمەبەستی رێگەخۆشکردن بۆ گەڕانەوەی واشنتۆن بۆ رێککەوتنەکە و پاشگەزکردنەوەی ئێران لە هەڵپەساردنی پابەندبوونەکانی.

بەرپرسانی ئێران چەندین جار رایانگەیاندووە: “بۆ پابەندبوونەوەمان بە رێککەوتنی ئەتۆمی پێویستە سەرەتا ئەمریکا سزاکانی هەڵبگرێت”.