رۆژنامەیەکی ئەمریکی: پێنتاگۆن پلانی هێرشکردنەسەر حەشدی شەعبی لە عێراق هەیە
SNN
رۆژنامەی دەیلی کۆڵەری ئەمریکی بڵاویکردووەتەوە، پێنتاگۆن پلانی هێرشکردنەسەر چەکدارانی حەشدی شەعبی لە عێراق هەیە و بۆ ئەو مەبەستەش داوای لە بایدن کردووە رەزامەندی نیشانبدات.
سەرچاوەیەکی ئاگادار بە رۆژنامە ئەمریکیەکەی وتووە: “ئیدارەی بایدن تاوتوێی ئەوە دەکات چۆن وەڵامی هێرشە مووشەکییەکانی بەشێک لە گروپە چەکدارییەکانی سەر بە حەشدی شەعبی بداتەوە کە دەیانکاتە سەر بنکەکانی هێزەکانی ئەمریکا لە عێراق”.
ئەوەشی ئاشکراکردووە: لەدوای کوشتنی قاسم سولەیمانی فەرماندەی فەیلەقی قودسی ئێران، پێنتاگۆن دەسەڵاتی وەڵامدانەوەی هەر هێرشێکی گروپە چەکدارییەکانی سەر بە حەشدی پێدراوە بەڵام هەر هێرشێکی پێنتاگۆن پێویستی بە گڵۆپی سەوزی کۆشکی سپی هەیە.
ئەمە لەکاتێکدایە هێرشی مووشەکی ئەو گروپە چەکدارییانەی عێراق کە دەوترێت نزیکن لە ئێرانەوە بۆ سەر بنکە سەربازییەکانی ئەمریکا بەردەوامە و لەدوای ئەوەی ئەمریکاش بڕیاریدا بگەڕێتەوە بۆ رێککەوتنی ناوەکی ساڵی 2015 ئەو هێرشانە زیادیانکردووە.
