هەوڵەکان لە پێناو دەستەبەرکردنی مووچە بۆ 10 هەزار کەس چڕ دەکرێنەوە

SNN

پەرلەمانتارێکی یەکێتی ئاشکرای کرد: ” وەزیری کار و کاروباری کۆمەڵایەتی عێراق بەڵێنی داوە ئاسانکاری بۆ جێبەجێکردنی مامەڵەی دەستەبەرکردنی مووچە بۆ 10 هەزار هاووڵاتی کەمدەرامەتی کەرکوک بکات”.

ئەڵماس فازیل، ئەندامی ئەنجومەنی نوێنەرانی عێراق لە فراكسیۆنی یەكێتیی نیشتمانیی كوردستان بەمیدیای رەسمی یەکێتی راگەیاندوە: “سەردانی د.عادل ئەلروكابی، وەزیری كار و كاروباری كۆمەڵایەتی لەحكومەتی فیدڕاڵی كردوە بەمەبەستی بەدواداچوون بۆ راپەڕاندن و جێبەجێكردنی مامەڵەی 10هەزار هاووڵاتی و دەستەبەركردنی مووچەی چاودێری كۆمەڵایەتی بۆیان”.

راشیگەیاند: “روكابی بەڵێنیداوە ئاسانكاری بۆ راپەڕاندن و جێبەجێكردنی مامەڵەی خێزانە كەمدەرامەتەكان لەپارێزگای كەركوك بكات و بودجەیەكی دارایی بۆ ئەم مەبەستە تەرخان بكرێت”، روونیشی كردەوە: “ئەو خێزانانەی مووچەی تۆڕی كۆمەڵایەتی دەیانگرێتەوە سەرجەم پێكهاتەكانی كەركوك دەگرێتەوە”، وتیشی: “ئێمە وەك یەكێتیی نیشتمانیی كوردستان، حزبەكەی سەرۆك مام جەلال، وەك یەك و بێ جیاوازی بۆ كورد و عەرەب و سەرجەم پێكهاتەكان كاردەكەین.”

ئاماژەشیدا: “لەپێناو پێشكەشكردنی خزمەتی زیاتر بەهاووڵاتیان، بەردەوام بەدواداچوون بۆ ئەم دۆسیەیە دەكەن و هەوڵی جێبەجێكردنی بەپەلەی مامەڵەكانیان  دەدەن”.