بافڵ تاڵەبانی: چیتر رێگەنەدرێت بەرژەوەندی خەڵک تێکەڵ بە ململانێ سیاسییەکان بکرێت
SNN
هاوسەرۆکی یەکێتیی نیشتمانی کوردستان لە درێژەی دیدارەکانی لەبەغدا لەگەڵ بەرپرسانی حکومی و حزبی عێراق، لەگەڵ سەرۆکی دەوڵەتی یاسا کۆبووەوە و لەکۆبوونەوەکەدا رایگەیاند: “چیتر رێگەنەدرێت بەرژەوەندی خەڵک و پرسە نەتەوەییەکان تێکەڵ بە ململانێ سیاسییەکان بکرێت”.
بافڵ تاڵەبانی، ھاوسەرۆکی یەکێتیی نیشتمانیی کوردستان لە بەغدا لەگەڵ نوری مالکی، سەرۆکی دەوڵەتی یاسا کۆبوووە.
لەکۆبوونەوەکەدا کە ژمارەیەک لە ئەندامانی مەکتەبی سیاسی و سەرکردایەتیی یەکێتی ئامادەیبوون گفتوگۆی ھەمەلایەنە لەسەر دۆخی گشتی و پرسە سیاسی، ئابووری، ئەمنییەکان کرا و کێشەکانی ھەرێم و عێراق و بونیادنانی زەمینەیەکی لەبار بۆ گفتوگۆی بونیادنەرانەی نیشتمانی و زاڵبوون بەسەر کێشە و ناکۆکییەکان تاوتوێکران.
بافڵ تاڵەبانی خواستی یەکێتی تەئکیدکردەوە بۆ چارەسەرکردنی ئەو کێشانەی بوونەتە بەربەست لەبەردەم تێپەڕاندنی ئەم دۆخە و قەیرانەکان و روونیکردەوە، یەکێتی لەسەر بنەمای بەرژەوەندی ھاوبەش و مێژوویی دەمانەوێت وەحدەیەکی نیشتمانی بونیادبنێن و بە بەشداری ھەموولایەک ھەوڵبدەین بەسەر گرفتەکان زاڵبین و چارەسەری کێشەکان بکەین و پەنا بۆ دیالۆگی نیشتمانی ببەین.
ھاوسەرۆک بونيادنانی پەيوەنديەکی بەهێز و پتەوی لە نێوان هەرێم و بەغدا بەفاکتەری پێشخستنی ھەرێم و عێراق لەقەڵەمدا و ئاماژەی بە بووژاندنەوەی پێکەوەژیان و یەکترقبووڵکردن و کۆتایھێنان بەدەمارگیری مەزھەبی، نەتەوەیی و ئایینی کرد و بۆئەوەش پڕۆژەی ئاشتەوایی نیشتمانیی بەزەروور لەقەڵەمدا. داواشیکرد دەستوور چەتری کۆکەرەوەی ھەمووان بێت و چیتر رێگەنەدرێت بەرژەوەندی خەڵک و پرسە نەتەوەییەکان تێکەڵ بە ململانێ سیاسییەکان بکرێت.
رۆژی شەممە بافڵ تاڵەبانی بە سەرۆکایەتی وەفدێکی باڵای یەکێتی گەیشتە بەغدا و ئەمرۆ یەکشەممە دەستی بە دیدارەکانی کرد لەگەڵ بەرپرسانی باڵای حکومی و سەرکردەی لایەنە سیاسییە کاریگەرەکانی عێراق.
