ترامپ بۆ بایدن: لە کاتی کۆبوونەوە لەگەڵ پوتین خەوت لێنەکەوێت
SNN
جۆ بایدن سەرۆکی ئەمریکا، بڕیارە لە 16ی حوزەیراندا کۆبوونەوەیەک لەگەڵ ڤلادەمیر پوتین سەرۆکی رووسیا، ئەنجامبدات.
لەو بارەیەشەوە دۆناڵد ترامپ سەرۆکی پێشووی ئەمریکا، راگەیەندراوێکی بڵاوکردوەتەوە و ئەوەی وەبیرهێناوەتەوە کە لە قۆناغی سەرۆکایەتی خۆیدا لەگەڵ پوتین لە شاری هێلسنکیی فینلەندا کۆبوونەوەیەکی زۆر بەرهەمداریان ئەنجامداوە و نووسیویەتی: “بەپێچەوانەی ئەوەی راگەیاندنە درۆزنەکان دەربارەی کۆبوونەوەکە بڵاویان کردبووەوە، ئەمریکا لەم کۆبوونەوەیەدا رێزی پوتین و رووسیا و زۆر شتی دیکەی بەدەستهێنا”.
ترەمپ، ئەو دۆسیەی لێکۆڵینەوانەی تایبەت بە رووسیا لە دژی کرابوونەوە، بە “پلانگێڕی هیلاری کلینتۆن و دیموکراتەکان” ناو بردووە و ئاماژەی بەوەش داوە کە سەرەڕای ئەو ئاستەنگ و دژوارییانەی بەهۆی ئەم دۆسیەی لێکۆڵینەوەیەوە دروستبوون، توانیویەتی پەیوەندییەکی باش لەگەڵ رووسیا و پوتین دروست بکات.
سەرۆکی پێشووی ئەمریکا، دەربارەی کۆبوونەوەکەی پوتین و بایدن نووسیویشیەتی: “هیوای بەختێکی باش بۆ جۆ بایدن دەخوازم. بایدن! لە کاتی کۆبوونەوەکەدا خەوت لێنەکەوێت و راستگۆیانەترین داواکارییەکانت بە پوتین رابگەیەنە”.
