ئێران هەناردەکردنی غاز بۆ عێراق زیاد دەکات

SNN

وتەبێژی وەزارەتی کارەبای عێراق رایانگەیاند: “ئێران ھەناردەکردنی غاز بە ئامانجی وەرگەرخستنی وێستگەکانی بەرھەمھێنانی کارەبا بۆ عێراق زیادکردووە و گەیاندوویەتی بە 30 ملیۆن مەتر سێجا لە رۆژێکدا”.

ئەحمەد عەبادی، وتەبێژی وەزارەتی کارەبای عێراق، لە لێدوانێکدا بۆ رۆژنامەی رۆژنامەی سەباحی نیمچە فەرمی رایگەیاندووە، ” لە میانی چەند رۆژی رابردوودا، ئێران ھەناردەکردنی غازی بۆ عێراق بۆ 30 ملیۆن مەتر پێی سێجا لە رۆژێکدا زیادکردووە، ئەوەیش دوای ئەوەی کە کەمی کردبوویەوە بۆ 17 ملیۆن مەتر سێجا لە رۆژێکدا”.

لەئێستادا عێراق، 19 ھەزار میگاوات کارەبا بەرھەم دەھێنێت لە کاتێکدا بۆ پڕکردنەوەی پێدوایستییەکانی هاووڵاتییان، دامەزراوە حکوومییەکان و کارگەکان پێویستی بە 30 ھەزار میگاوات کارەبا ھەیە.

ئەحمەد عەبادی باسی لەوەشکردووە کە زیادکردنی ھەناردەکردنی غاز لەلایەن ئێرانەوە بۆ عێراق، بووەتە مایەی وەگەرخستنی وێستگەکانی بەرھەمھێنانی کارەبای مەنسوریە، سەدر و بسمایە و وتی: “لە ئەنجامی ئەو ھەنگاوەی ئێران، بەرھەمھێنانی کارەبا بۆ 22 ھەزار و 100 میگاوات زیادی کردووە، ھەروەھا پێدانی کاتژمێرەکانی کارەبای نیشتمانیی لە بەغدا و پارێزگاکانی دیکە زیادی کردووە”.