ئەنتۆنی بلینکن: هێرشەکانمان بۆ سەر گروپەکانی سەر بە ئێران بە فەرمانی بایدن بووە

SNN

وەزیری دەرەوەی ئەمریکا دەڵێت: هێرشەکانی سەر حەشدی شەعبی لە سەر سنوری عێراق و سوریا بە فەرمانی راستەوخۆی جۆ بایدن سەرۆکی ئەو وڵاتە بووە و تیایدا سێ کۆگای چەک کراونەتە ئامانج.

ئەنتۆنی بلینکن وەزیری دەرەوەی ئەمریکا لە لێدوانکدا رایگەیاند: “سوپای ئه‌مه‌ریكا بە فەرمانی راستەوخۆی سەرۆکی وڵاته‌كه‌مان هێرشی ئاسمانی کردە سەر ئەو پێگانەی لەلایەن گروپەکانی سەر بە ئێرانەوە لە ناوچەکانی سەر سنووری عێراق و سووریا بەکاردەهێنرێن”.

وتیشی: “ئەو گرووپانەی بۆردومان کراون، بەرپرسیاری ئەو هێرشانەن، كه‌ لە ماوەی رابردوودا کراونەتە سەر بەرژەوەندییەکانی ئەمه‌ریکا لە عێراق.”

هەر وەک روونیشیکردوەتەوە دوو کۆگای حزبوڵا و سەیدوشوهەدا لە سوریا و کۆگایەکیشیان لە عێراق بۆردومان کراوە.

جەختیشی کردوەتەوە، “هەموو کات وەڵامی هێرشەکانی ئەو گروپانە دەدەنەوە و کاردانەوەیەکی ورد و ئامانجداریان هەبووە و پەیامێکی روونیان بۆ گروپەکانی سەر بە ئێران ناردووە”.

بەپێی زانیارییەکان بەرەبەیانی ئەمڕۆ دووشەممە لە بۆردومانی ئەمریکا بۆ سەر ژمارەیەک لە چەکدارانی حەشدی شەعبی لە سەر سنوری عێراق و سوریا لە ناوچەی قائیم لانیکەم چوار چەکدار کوژراون.