رێکخراوەکانی ژینگە: پارەکەی حکومەت بۆ ئاودانی باخچەکانی سلێمانی هێشتا نەگەیشتووە

SNN

رێکخراوەکانی ژینگە رەخنە لە سەرۆکی حکومەت دەگرن کە دوای مانگێک لە بەڵێنەکەی، هێشتا پارەی بۆ باخچە و بلوارەکانی سلێمانی تەرخان نەکردووە.

بۆردی رێکخراوە ژینگەییەکانی سلێمانی و هەڵەبجە، ئەمڕۆ لە کۆنفرانسێکی رۆژنامەوانیدا سەرنجی خستە سەر ئەوەی، لە مانگی ئایاردا سەرۆکی حکومەت بەڵێنیدابوو کە پێنج ملیار و 700 ملیۆن دینار بۆ سەوزکردنەوەی باخچە و بلوارەکانی سلێمانی تەرخان بکرێت، بەڵام پاش دوو هەفتە ئەو بڕە پارەیە کەمکرایەوە و بە نوسراوێک کە واژووی سەرۆکی دیوانی ئەنجومەنی وەزیرانی لەسەرە راگەیەندرا کە چوار ملیار و 527 ملیۆن دینار خەرج دەکرێت، لەگەڵ ئەوەشدا هێشتا ئەو پارەیە دابین نەکراوە.

بۆردی رێکخراوە ژینگەییەکان دەپرسێت “بۆچی ماوەی پێنج ساڵە سلێمانی لە وەرزی هاویندا باخچە و بلوارەکانی وشک دەبن، ئەم گرفتەش بەتەنیا لە سلێمانی هەیە”.

دەشڵێت: “رۆژانە باخجە و پارک و بلوارەکانی سلێمانی پێویستیان بە یەک ملیار لیتر ئاو هەیە، لە مانگەکانی حەوت و هەشت پێویستیان بە چوار ملیار لیتر ئاو هەیە”.

دەشڵێت لەم ماوەیەدا 130 ملیۆن دینار بۆ ئاودانی باخچە و بلوارەکان دابینکراوە کە 30 ملیۆن لەلایەن پارێزگاری سلێمانییەوە و 100 ملیۆنی لەلایەن لاهور شێخ جەنگی هاوسەرۆکی یەکێتییەوە دابینکراوە.