بکوژانی خۆپیشاندەرانی عێراق دەستگیردەکرێن

SNN

فەرمانی دەستگیرکردن بۆ ژمارەیەک لە بکوژانی خۆپیشاندەرانی عێراق دەرچووە، لەنێویشیاندا بکوژی هشام هاشمی کە کوژرانی ئەو، کۆمەڵگای نێودەوڵەتی لەسەر هاتنەدەنگ.

فایەق زێدان، سەرۆكی ئەنجومەنی باڵای دادوەری عێراق ڕایگەیاند: فەرمانی دەستگیرکردن بۆ بکوژی هشام هاشمی و خۆپیشاندەرانی دیکە دەرچووە، هەروەها هەندێك لە کەیسەکانی كوشتنی خۆپیشاندەران یەکلابوونەتەوە بەتایبەت لە كوت و بابل، سزای لەسێدارەدان بەرامبەر ئەفسەرێكیش دەرکراوە.

ناوبراو بە ئاژانسی هەواڵی عێراقی وتووە: “دۆسیەی كوشتنی خۆپیشاندەران قورسە و لایەنی سیاسی  دەستێوەردانی كردووە بە ئامانجی هەڵبژاردن و بۆ لێدان لە لایەنی دیكە.

سەرۆكی ئەنجومەنی باڵای دادوەری دوپاتیشیكردەوە، دادگا لەژێر فشاردا نەبووە لە دۆسیەی قاسم موسڵح سەركردەی حەشدی شەعبی کە دوای دەستگیرکردنی بە تۆمەتی تیرۆر ئازادکرا.

کوشتنی خۆپیشاندەران و چالاکوانانی عێراق ئەمریکا و وڵاتانی دیکەی رۆژئاوای نیگەران کردووە و فشاردەکەن تا ئەنجامدەرانی بە سزابگەیەندرێن.