لیژنەی وزە: نرخی بەنزین بەمنزیکانە دادەبەزێت

SNN-عەلی حەمە سەعید
ئەندامێكی لیژنەی وزە و سامانە سروشتییەكان لە پەرلەمانی كوردستان ئاماژە بەوەدەكات لە چەند ڕۆژی داهاتوودا نرخی بەنزین دادەبەزێت و بڕەكەشی زیاد دەكرێت.

رێبوار بابكەیی، ئەندامی لیژنەی وەزە و سامانە سروشتییەكان لە پەرلەمانی كوردستان بە SNNی ڕاگەیاند: دوای هەوڵێكی زۆری ئەندامانی لیژنەی وزە و سامانە سروشتییەكان و گفتوگۆكردنمان لەگەڵ وەزیری سامانە سروشتیەكان، توانیمان بگەینە لێكتێگەیشتنی باش بۆ دووبارە هەرزانكردنەوەی نرخی بەنزین، بەجۆرێك بتوانین بەرهەمی ناوخۆیی زیاد بكەین و هەروەها باجیش لەسەر ئەو كۆمپانیایانە كەمبكەینەوە كە لە دەرەوە بەنزین هاوردە دەكەن.

ئاماژەی بەوەشكرد: وەزیری سامانەسروشتییەكان بە پێشنیارەكانی ئێمە ڕازیبووە، چ لە ڕووی كەمكردنەوەی باج لەسەر كۆمپانیاكانی هاوردەكردنی بەنزین لەدەرەوە و چ لە ڕووی بەرزكردنەوەی ئاستی بەرهەمی ناوخۆیی، بەجۆرێك بەرهەمی ناوخۆیی بەنزین بۆ سێ‌ ملیۆن لیتر بەنزینی ڕۆژانە بەرز بكەینەوە و هاوكات بە هاوردەكردنی دوو ملیۆن لیتری دیكە پێداویستی ڕۆژانەی هاووڵاتیان پڕدەبێتەوە كە دەكاتە پێنج ملیۆن لیتر بەنزینی ڕۆژانە.

ئەو ئەندامەی لیژنەی وزە و سامانە سروشتییەكان ئەوەشی خستەڕوو، لە ئێستادا ناتوانین بە دیاریكراوی نرخی بەنزین دیاری بكەین و بڵێن نرخی بەنزین بۆ 600 دینار یان هەر نرخێكی دیكە دادەبەزێت، بەڵام دڵنیایی دەدەینە هاووڵاتیان كە لە چەند ڕۆژی داهاتوودا نرخی بەنزین دادەبزێت و نرخەكەشی جێگیر دەكرێت ئەوەش بە خستنەبواری ئەو پلانەی كە ئێمە ئاراستەی وەزارەتی نەوت و سامانە سروشتییەكانمان كردووە.