شاندێکی باڵای رۆژئاوا لەگەڵ سەرۆکی فەڕەنسا کۆبوونەوە

SNN

شاندێکی باڵای ئەنجومەنی سوریای دیموکرات لەگەڵ سەرۆکی فەڕەنسا کۆبوونەوە و تاوتوێی رەوشی رۆژئاوای کوردستان و گەمارۆی سەر باکووری رۆژهەڵاتی سوریایان کرد.

بەگوێرەی راگەیاندراوەکەى ناوەندی چاپەمەنی و راگەیاندنی بەڕێوەبەری خۆسەردا هاتووە، ئیلهام ئەحمەد هاوسەرۆکی دەستەى بەڕێوەبەری ئەنجوومەنی سوریای دیموکراتیک ، بێریڤان خالید هاوسەرۆکی ئەنجوومەنی بەڕێوەبەری بەڕێوەبەرایەتیی خۆسەری باکوور و رۆژهەڵاتی سوریا و خەسان یوسف هاوسەرۆکی ئەنجوومەنی بەڕێوەبەری بەڕێوەبەرایەتیی مەدەنیی دێرەزۆر لەگەڵ ئیمانوئیل ماکرۆن سەرۆک کۆماری فەرەنسا کۆبوونەتەوە.

بەپێی راگەیاندراوەکە، لە کۆبوونەوەکەدا لەبارەی دۆخی سیاسیی ناوچەکە بە تایبەتی قەیرانی سوریا و هەروەها لێکدانەوە بۆ پێشنیازەکانی چارەسەری کراون.

لە کۆبوونەوەکەدا گفتوگۆ لەبارەی بەڕێوەبەریی باکوور و رۆژهەڵاتی سوریا و مۆدێلە بەڕێوەبەرییە دیموکراتیکەکەی کرا و باسیش لە گەمارۆی سەر باکوور و رۆژهەڵاتی سوریا کرا.

شاندەکە لەبارەی شەڕ لە دژی داعش زانیاریی وردیان بە ماکرۆن دا و باسیان لەوە کرد، داخستنی دەروازە سنوورییەکان کاریگەرییەکی خراپی لەسەر ناوچەکە دروست دەکات.