بلینکن: کات بۆ گەڕانەوەی ئێران بۆ رێککەوتنی ئەتۆمی سنوردارە
SNN
وەزیری دەرەوەی ئەمریکا هۆشداری دەداتە ئێران، بەوەی کە بۆ گەڕانەوەی بۆ رێککەوتنی ئەتۆمی کاتێکی بێسنوری لەدەردەمدا نییە و پێویستە خۆی یەکلایی بکاتەوە.
ئەنتۆنی بلینکن، وەزیری دەرەوەی ئەمریکا سەبارەت بە دانوستانەکانی بەگەڕخستنەوەی رێککەوتنی ئەتۆمی ساڵی 2015 رایگەیاند: واشنتۆن نیازپاکی تەواوی خۆی نیشانداوە و دەیەوێت بگەرێتەوە بۆ ئەو رێککەوتنە.
راشیگەیاند: لە ئێستادا تۆپەکە لە گۆڕەپانی ئێراندایە و دەبێت کۆتا بڕیاربدات، چونکە بۆ دانوستان و بەگەڕخستنەوەی رێککەوتنی ئەتۆمی کاتێکی بێسنوری لەبەردەمدا نییە.
جەختیشی کردەوە، کە ئەگەر تاران بەردەوام بێت لە چالاکیە ئەتۆمیەکانی ئێستای، سەرلەنوێ بەگەڕخستنی رێککەوتنەکەی ساڵی 2015 ئەستەم دەبێت.
ساڵی 2015 ئێران لە گەڵ وڵاتانی پێنج کۆیەک، کە لە پێنج ئەندامی هەمیشەیی ئەنجومەنی ئاسایشی نێودەوڵەتی و ئەڵمانیا پێکهاتبوون، ریککەوتنێکی ئەتۆمی واژۆکرد، بە پێی رێککەوتنەکە لەبەرامبەر سنوردارکردنی بەرنامە ئەتۆمیەکەی حکومەتی تاران، بەشێک لە سزاکانی سەر ئەو وڵاتە هەڵگیران.
ساڵی 2018 ئەمریکا لەسەردەمی سەرۆکایەتی دۆناڵد ترەمپ لە رێککەوتنەکە کشایەوە و سزاکانی بۆ سەر ئێران گەڕاندەوە، لەبەرامبەریشدا تاران پابەندبوونەکانی بە رێککەوتنی ئەتۆمی هەڵپەسارد و چالاکیەکە ئەتۆمیەکانی فراوانتر کرد.
لەدوای هاتنەسەرکاری جۆ بایدن واشنتن خواستی خۆی بۆ گەڕانەوە بۆ رێککەوتنی ئەتۆمی نیشاندا و لە مانگی نیسانی ئەمساڵە بۆ ئەو مەبەستە شەش گەڕی دانوستان لە ڤییەنا لە نێوان تاران و ئەو وڵاتانەی لە رێککەوتنەکەدا ماون بەڕێوەچووە، بەڵام لەسەروبەندی هەڵبژاردنی سەرۆکایەتی کۆماری ئێران دانوستانەکان راگیران و چاوەڕوان دەکرێت دوای دەستبەکاربوونی ئیبراهیم رەئیسی سەرۆککۆماری هەڵبژێردراوی ئەو وڵاتە جارێکی تر دانوستانەکان دەستپێبکەنەوە.
