وەزارەتی بازرگانی: سێ هەزار و 919 كارگە لە هەرێمی کوردستان تۆمارکراوە
SNN-عەلی حەمە سەعید
راوێژكارێكی وەزارەتی پیشەسازی و بازرگانی ئاماژە بەوەدەكات: “لە ئێستادا لە هەرێمی كوردستان سێ هەزار و 919 كارگەی گەورە و مامەناوەند لە وەزارەت تۆماركراون، لەو ژمارەیەش دوو هەزار و 350 كارگەیان لە كاردان زۆرترین كارگەی كە لەكاردان لە پارێزگای سلێمانیدا و ئەو كارگانەشی لە قۆناغی دروستكردندان زۆرترینیان لە پارێزگای هەولێرن”.
فەتحی محەمەد، راوێژكاری پەیوەندییەكانی ئابووری لە وەزارەتی پیشەسازی و بازرگانی بە SNNی ڕاگەیاند: لە ئێستادا لە هەرێمی كوردستان سێ هەزار و 919 كارگەی گەورە و مام ناوەند و بچوك لە وەزارەتی پیشەسازی تۆماركراون، لەو ژمارەیەش زۆرترین ژمارەی كارگە لە هەرێمی كوردستان دەكەونە سنووری پارێزگای هەولێر كە ژمارەیان دوو هەزار و 805 كارگەیە، لە پارێزگای سلێمانی هەزار و 40 كارگە و لە پارێزگای دهۆكیش 371 كارگە تۆماركراون، هاوكات زۆرترین ژمارەی ئەو كارگانەی كە لە كاردان دەكەونە پارێزگای سلێمانی و زۆرترین ئەو كارگانەشی كە لە قۆناغی دروستكردندان دەكەونە پارێزگای هەولێر، تا ئێستاش پارێزگای هەڵەبجە لەسەر پارێزگای سلێمانی ئەژمار دەكرێت بۆیە هیچ كارگەیەكی تۆماركراومان لەو پارێزگایەدا نییە.
ئاماژەی بەوەشكرد: “لە كۆی ئەو كارگانەی لە وەزارەتەكەمان تۆماركراون دوو هەزار و 350 كارگەیان بەردەوامن لەكاركردن و بەرهەمیان هەیە، ئەوانی دیكە لە قۆناغی دامەزراندندان، هاوكات لە كۆی ئەو سێ هەزار و 919 كارگەیە تەنها 33 كارگەیان حكومین لەو 33 كارگەیەش 19 كارگەیان بە كرێ دراون بە كەرتی ئەهلی، بەڵام تا ئێستا نازانین داهاتی ساڵانە و مانگانەی كارگەكانی هەرێم چەندە ئەوەش بەهۆی ئەوەی لەلایەن كەرتی تایبەتەوە سەرپەرشتی و خاوەنداری دەكرێن”.
ئەو ڕاوێژكارەی وەزارەتی پیشەسازی ئەوەشی خستەروو: ئەو دوو هەزار و 350 كارگەیەی كە لەئێستادا لەكاردان توانیویانە هەلی كار بۆ زیاد لە 58 هەزار هاووڵاتی بڕەخسێنن كە بەشێك لەو كەسانەی لەو كارگانە كاردەكەن كرێكار و ئەندازیاری بیانین، لەگەڵ ئەوەشدا تا ئیستا زیاد لە دوو ملیار دۆلار بە تێچووی دامەزراندنی ئەوكارگانە خەمڵێندراوە”.
