هەناردەی نەوتی ئێران دوو هێندە زیادیکردوە و ئەمریکاش سزای نوێی بەسەردا دەسەپێنێت

SNN

ئاستی هەناردە و داهاتی نەوتی ئێران بۆ نزیکەی دوو هێندە بەرزبوەتەوە، ئەمریکاش سزای نوێی بەسەر کەرتی ئەو وڵاتەدا سەپاند.

بەپێی راپۆرتێکی رێکخراوی ئۆپێک لە حەوت مانگی رابردوودا ئێران بە شێوەی مامناوەند هەر بەرمیلێک نەوتی بە 65 دۆلار فرۆشتووە، ئەمەش لە کاتێکدایە لە ماوەی هاوشێوەی ساڵی رابردوو هەربەرمیێکی بە 35 دۆلار فرۆشتبوو.

راشیگەیاندوە، ساڵی رابردوو ئێران رۆژانە دوو بەرمیل نەوتی بەرهەمهێنابوو، بەڵام ئەمساڵ گەیاندوویەتیە سەرووی 2 ملیۆن 500 هەزار بەرمیلی رۆژانە.

هاوکات ئامارەکانی کۆمپانیاکانی چاودێری نەوتهەڵگرەکان دەریدەخات لە نیوەی یەکەمی ئەمساڵدا ئێران رۆژانە 650 هەزار بەرمیل نەوتی فرۆشتووە، ئەوەش دوو هێندەی بڕی نیوەی یەکەمی ساڵی رابردووە.

لەلایەکی ترەوە وەزارەتی گەنجینەی ئەمریکا رایگەیاند، ژمارەیەک کۆمپانیای و کەسایەتیان خستوەتە لیستی سزاکانیانەوە، کە لە ماوەی رابردوودا رۆڵیان هەبووە لە فرۆشتن و بە بازاڕکردنی نەوتی ئێران.

ساڵی 2018 دوای ئەوەی ئەمریکا لە رێککەوتنی ئەتۆمی کشایەوە و سزاکانی بەسەر حکومەتی تاراندا سەپاندەوە، هەناردەی نەوتی ئێران بۆ نزمترین ئاست دابەزی، ئەوەش زەبری گەورەی لە ئابوری ئەو وڵاتەدا، بەڵام دوابەدوای هاتنەسەرکاری جۆ بایدن وەک سەرۆکی ئەمریکا و دەستپێکردنی دانوستانەکانی بەگەڕخستنەوەی رێککەوتنی ئەتۆمی، هەناردەی نەوتی ئێران رووی لەهەڵکشان کردەوە.