عێراق لەبەردەم شەپۆلی چوارەمی کۆرۆنادایە

SNN

شانەی قەیرانەکانی عێراق هۆشداریدا لە دروستبوونی شەپۆلێکی دیکەی بڵاوبوونەوەی ڤایرۆسی کۆرۆنا لە عێراق بەهۆی یادی عاشوراوە.

جەواد موسەوی بڕیاردەری شانەی قەیرانەکانی سەر بە پەرلەمانی عێراق رایگەیاند: لەئێستادا شەپۆلی سێهەمی بڵاوبوونەوەی کۆرۆنا روو لە کەمبوونەوە کردووە و بەجۆرێک نزیکە ئەم شەپۆلە کۆتایی دێت، بەڵام بەهۆی پابەندنەبوونی هاووڵاتیان و یادی عاشوراوە پێشبینی دەکەین شەپۆلی چوارەمی پەتاکە لە عێراق سەرهەڵبدات و جارێکی دیکە حاڵەتەکانی مردن و توشبوون بە کۆرۆنا زیادبکات”.

موسەوی وتی : “هێشتا وەرگرتنی ڤاکسین لە لایەن هاووڵاتیانەوە بەگوێرەی پێویست نییە و رێگر نابێت لەبەردەم هەڵکشانەوەی ژمارەی حاڵەتەکان”.

هەر لەبارەی ئامارەکانی ڤاکسینەوە وتی: “تا ئێستا دوو ملیۆن کەس لە وڵاتەکەدا ڤاکسینیان وەرگرتووە و خوازیارین رێژەی وەرگرتنی ڤاکسین بگاتە 50%”.

ناوبراو داوای لە رێکخەرانی یادی عاشورا کرد کە بەکارهێنانی ماسک و خۆپارێزی بکەنە مەرج بۆ بەشداریکردن، لەکاتێکدا کە قەرەباڵغییەکی زۆر دروستدەبێت.