نرخی سەوزە و میوە بەرزبووەتەوە و لایەنە پەیوەندیدارەكانیش باس لە هۆكارەكەی دەكەن

SNN-عەلی حەمە سەعید

بەڕێوەبەری چاودێری بازرگانی سلێمانی رايگەياند: “بەهۆی بڕیارێكی وەزارەتی كشتوكاڵ كە باجی لەسەر بەروبومی دەرەكی داناوە و نرخی سەوزە و ميوە بەرزبووەتەوە، بەڵام لە پێناو بەرژەوەندی گشتی پێدچوونەوە بەو بڕیارانەدا دەكرێت”.

سۆران عەبدولغەفور، بەڕێوەبەری چاودێری بازرگانی سلێمانی بە SNNی راگەیاند: “چەند رۆژێكە نرخی سەوزەو میوە و پێداویستی خۆراكی ڕۆژانەی هاووڵاتیان لە عەلوەی سلێمانی بەردەوامە لە بەرزبوونەوە، ئەوەش بەهۆی چەند هۆكارێكەوە بە تایبەت بەهۆی بڕیارێكی وەزارەتی كشتوكاڵ كە لە 2021/6/15 دەرچووە تایبەت بە دانانی باج لەسەر هاوردەكردنی بەروبومی دەرەكی بۆ ئەوەی بەروبومی ناوخۆیی ساغ ببێتەوە و جوتیارانی هەرێم توشی زەرەرو زیان نەبن”.

ئاماژەی بەوەشكرد: “ئێمە ڕۆژانە ڕاپۆرتی خۆمان ئاراستەی وەزارەتی كشتوكاڵ دەكەین بۆیە ئەگەر نرخەكان لەمە زیاتر بەرز ببێتەوە بێگومان وەزارەتی كشتوكاڵیش لەبەرژەوەندی گشتی پێداچوونەوە بە بڕیارەكانی دەكات و ئەو باجەی لەسەر هاوردەكردنی بەروبومی دەرەكی دانراوە یان كەمدەكریتەوە یاخود لادەبرێت، چونكە ناكرێت هاووڵاتیان نرخەكانیان لەسەر زیادبكرێت”.

بەڕێوەبەری چاودێری بازرگانی سلێمانی ئەوەشی خستەڕوو: “بۆ هەر كیلۆیەك تەماتە هەزار و 250 دینار و خەیار بە هەزار دینار دەفرۆشرێت لە عەلوەكان دواتر فرۆشیارەكانیش كرێی گواستنەوە و قازانجی خۆیان دەخەنەسەر تا دەگاتە دەستی هاووڵاتیان، بۆیە ئەگەر بزانین بەرهەمی ناوخۆیی بەرەو كەمبوونەوە دەچێت و بەشی پێداویستی ناوخۆیی ناكات ئەوا لەلایەن وەزارەتی كشتوكاڵەوە پێداچوونەوە بە بریارەكانیاندا دەكریت و نرخەكان هەرزان دەكرێت”.