پەرلەمانتارێک: هەڵبژاردن بۆ 21ی نیسان دوادەخرێت

SNN

پەرلەمانتارێکی سەر بە فراکسیۆنی بەیارق ئەلخێر لە پەرلەمانی عێراق رایگەیاند: “پێشبینی دەکرێت هەڵبژاردنی عێراق بۆ 21ی نیسانی ساڵی داهاتوو دوابخرێت”، سێ سەرۆکایەتیەکەی عێراقیش هەفتەی داهاتوو کۆدەبنەوە.

محەمەد خالیدی رایگەیاندووە: هەفتەی داهاتوو سێ‌ سەرۆكایەتییەكە (سەرۆكایەتی كۆمار، ئەنجوومەنی وەزیران ‌و پەرلەمان) لەگەڵ سەركردەی لایەنە سیاسییەكان كۆدەبنەوە، كۆبوونەوەكە تایبەت دەبێت بە پرسی دواخستنی هەڵبژاردنەكەی تشرینی یەكەم ‌و تێیدا، دواخستنی هەڵبژاردنەكە رادەگەیەندرێت، هەڵبژاردنەكە دوادەخرێت بۆ 21ی نیسانی ساڵی داهاتوو.

ئەو پەرلەمانتارە، جەختیشی لەوەكردۆتەوە كە ئەستەمە هەڵبژاردنەكەی عێراق بكرێت، لەكاتێكدا رەوتی سەدر، لێی كشاوەتەوە.

ئەمە لەکاتێکدایە دوێنێ مستەفا کازمی سەرۆکوەزیرانی عێراق جەختی لەوەکردەوە کە هەڵبژاردن لە وادەی خۆیدا ئەنجام دەدرێت، کۆمسیۆنی باڵای هەڵبژاردنەکانی عێراقیش ئامادەکاری بۆ کردووە، بەڵام بەشێک لە لایەنەکان لەگەڵ دواخستنیدان.