ئاسۆ حەوێزی: وەرگرتنی ڤاکسینمان لەلایەن مامۆستایانەوە نەکردووەتە مەرج

SNN-عەلی حەمە سەعید
لەگەڵ نزیك بوونەوە لە وادەی دەستپێكردنەوەی ساڵی نوێی خوێندنی 2021- 2022 لە ئێستادا قسەوباسی گەرم لە نێوان مامۆستایاندا ئەوەیە كە مەرجە مامۆستایان بە ڤاكسینی دژە كۆرۆنا خۆیان كوتابێت پاشان ڕێگەیان پێدەدرێت دەوام بكەن، وتەبێژی وەزارەتی تەندروستیش ئاماژە بەوەدەكات لەگەڵ ئەوەی مەبەستمانە زۆرترین مامۆستا ڤاكسین وەربگرێت بەڵام هێشتا نەمان كردووەتە مەرجێكی ناچاری.

د.ئاسۆ حەوێزی، وتەبێژی وەزارەتی تەندروستی حكومەتی هەرێم بەSNNی ڕاگەیاند: وەك ئەو پلانەی كە هەر لە سەرەتای بەدەستگەیشتنی ڤاكسین بۆ هەرێمی كوردستان دامانڕشتووە مەبەستمانە زۆرترین هاووڵاتیان لە چین و توێژە جیاوازەكان ڤاكسینی كۆرۆنا وەربگرن بۆ ئەوەی بتوانین بەرگری بە كۆمەڵ لەدژی ڤایرۆسەكە دروست بكەین، لەو چوارچێوەیەشدا مامۆستایان وەك توێژێكی گەورە زۆر گرنگە بەلامانەوە كە زۆرترین رێژەی مامۆستایان ڤاكسینی دژە كۆرۆنا وەربگرن بۆئەوەی پرۆسەی خوێندن پەكی نەكەوێت لە ساڵی نوێی خوێندندا.

ئاماژەی بەوەشكرد، ئێمە تا ئێستا وەرگرتنی ڤاكسینمان لە لایەن مامۆستایانەوە نەكردووەتە مەرج بۆ ئەوەی بتوانێت لەگەڵ دەستپێكردنەوەی ساڵی خوێندن دەوام بكات، بەڵكوو ئێمە لە سەنتەرەكانی كوتانی ڤاكسین لە شاروشارۆچكەكان ڕۆژێكمان تایبەتكردووە بۆ ئەوەی تەنها مامۆستایان ڤاكسین وەربگرن، بۆیە ئەگەر وەرگرتنی ڤاكسین بكەین بە مەرج دەبێت رێژەی پێویستی ڤاكسینیش دابین بكەین.

وتەبێژەكەی وەزارەتی تەندروستی ئەوەشی خستەڕوو، بەهۆی ئەوەی لە ناوەندەكانی خوێندن زۆرترین بەركەوتن و تێكەڵاوبوون هەیە زۆر گرنگە بەلامانەوە كە هەموو ڕێكارەكانی خۆپارێزی لە وەرگرتنی ڤاكسین و جێبەجێكردنی ڕێكارە تەندروستییەكان بگیرێتەبەر بۆ ئەوەی لە لایەك پرۆسەی خوێندن پەكی نەكەوێت لەلایەكی دیكەش ناوەندەكانی خوێندن نەبنە هۆی زیاتر بوونی بلاو بوونەوەی ڤایرۆسی كۆرۆنا.

وتەكانی وتەبیژی وەزارەتی تەندروستی لەكاتێكدا كە وابڕیارە لە 14/9/2021 لەسەرجەم ناوەندەكانی خوێندنی قۆناغی بنەڕەتی و ئامادەیی دەستبكرێتەوە بە ساڵی نوێی خوێندنی 2021 – 2022