لە سلێمانی سەنتەری وەرگرتنی ڤاكسین بۆ مامۆستایان دەکرێتەوە

SNN

ئەمڕۆ چوارشەممە لەپارێزگای هەولێر هەڵمەتی پێدانی ڤاکسین بەمامۆستایان و فەرمانبەرانی کەرتی پەروەردە دەستیپێکرد و وەزیری پەروەردەش رایگەیاند: لە ئێستادا سەنتەری وەرگرتنی ڤاكسین بۆ مامۆستایان لەپارێزگاکانی هەولێر و دهۆک کراونەتەوە و لەداهاتوویەکی نزیکدا هەمان سەنتەر لەسلێمانیش دەکرێتەوە.

ئالان حەمە سەعید، وەزیری پەروەردەی هەرێم بەرۆژنامەنوسانی راگەیاند: کردنەوەی سەنتەری وەرگرتنی ڤاكسین بۆ مامۆستایان هەنگاوێکی گرنگی کارکردنی بەیەکەوەیی نێوان هەردوو وەزارەتی تەندروستی و پەروەردەی حکومەتی هەرێمە بۆ پاراستنی تەندروستی گشتی و جێبەجێکردنی رێنماییەکان پێش دەستپێکردنەوەی پرۆسەی خوێندن، زۆرترین رێژەی وەرگرتنی ڤاکسین لەلایەن مامۆستایانەوە لەسنووری پارێزگای دهۆک تۆمارکراوە و تا ئێستاش 60 هەزار مامۆستا ناوی خۆیان بۆ وەرگرتنی ڤاکسین تۆمارکردوە.

وا بڕیارە رۆژی 14ـی ئەیلول دەوامی خوێندیان دەستپێبکاتەوە و لەئێستادا هەڵمەتێک بۆ وەرگرتنی ڤاکسینی کۆرۆنا لەلایەن مامۆستایان و فەرمانبەرانی کەرتی پەروەردەوە بەڕێوەدەچێت.