فەرمانی دەستگیرکردن بۆ سێ بەشداربووی کۆنگرەکەی هەولێر دەرچوو
SNN
ئەنجوومەنی باڵای دادوەری عێراق رایگەیاند: فەرمانی دەستگیرکردن بۆ ئەو کەسانە دەرچووە کە بەشدارییان لە کۆبوونەوەی هۆزە عەرەبییەکان لە هەولێر کردووە.
ئەمڕۆ یەکشەممە، ئەنجوومەنی باڵای دادەوەری لە بەیاننامەیەکیدا ئاماژەی بەوەکرد: “لەسەر بنەمای پێدانی زانیاری لەلایەن راوێژکاری ئاسایشی نەتەوییەوە، دادگای لێکۆڵینەوەی کەرخی یەک، فەرمانی دەستگیرکردن بۆ وسام حەردان دەرچووە، کە رۆڵی هەبووە لە رێکخستنی کۆبوونەوەی هۆزە عەرەبییەکان لە هەولێر و داوای ئاساییکردنەوەی پەیوەندییەکانی لەگەڵ ئیسرائیل کردووە “.
ئەوەش خراوەتەڕوو:”هەروەها فەرمانی دەستگیرکردن بۆ هەریەکە لە میسال ئەلووسی و سەحەر کەریم تائی فەرمانبەری وەزارەتی رۆشنبیریش دەرچووە و رێککاری یاسایی بەرامبەر سەرجەم ئەو کەسانەی دیکەش دەگیرێتەبەر کە بەشدارییان لە کۆبوونەوەکەدا کردبوو “.
رۆژی هەینی ڕابردوو، زیاتر لە 300 کەسایەتی عەشایەری سونە و شیعەی عێراق کۆنگرەیەکیان لە هەولێر بەست لەژێر ناوی “مؤتمر السلام والاسترداد – کۆنگرەی ئاشتی و چاکبوونەوە”، لە بەیاننامەی کۆتایی کۆنگرەکەدا داوای ئاساییکردنەوەى پەیوەندییەکانی عێراق و ئیسرائیل کرا.
دواتر کۆبوونەوەکە لەسەر ئاستی حکومەتی عێراقی نارەزايی لێکەوتەوە و حکومەتی هەرێميش رايگەياند: ” ئاگامان لە بەستنی کۆنگرەکە نەبووە و ناوەڕۆکەکەى ڕای حکومەتی هەرێم نییە”.
