عێراق بۆ ماوەی سێ رۆژ سنوورەکانی بە رووی جيهاندا دادەخات

SNN

عێراق بۆ ماوه‌ی سێ رۆژ سنووره‌كانی به‌رووی جیهاندا داده‌خات و هەموو دەروازە وشکانی و ئاوی و ئاسامانییەکان دەگرێتەوە.

لیژنه‌ی باڵای ئه‌منی، تایبه‌ت به‌ هه‌ڵبژاردنی پێشوه‌خته‌ له‌ عێراق لە راگەيەندراوێکدا بڵاويکردەوە: “لە 9ی تشرینی یەکەمەوە بۆ ماوه‌ی سێ رۆژ، ته‌واوی ده‌روازه‌كانی وشكانی، ئاوی و ئاسمانی به‌ رووی جیهاندا دابخات، هەروەها هاتووچۆی فڕۆكه‌ی بێفڕۆكه‌وان و هاتوچۆی نێوان پارێزگاكانیش قەدەغە دەکرێت”.

ليژنەی ئەمنی راشيگەياندووە: “ئەو بڕیارە بۆ باشتر به‌ڕێوه‌چوون و پاراستنی ئاسایشی هه‌ڵبژاردنی پێشوەختەی عێراقە”.

دەنگدانی تایبەت بۆ هەڵبژاردنی ئەنجومەنی نوێنەرانی عێراق لە 8ی تشرينی يەکەم و دەنگدانی گشتی لە 10ی تشرينی يەکەم بەڕێوەدەچێت.

بۆ هەڵبژاردنی ئەمجارە، لە عێراق و هەرێمی کوردستان 24 ملیۆن و 299 هەزار کەس مافی دەنگدانیان هەیە. لە هەڵبژاردنی پێشوەختە هەشت هەزار و 273 بنکە هەن دابەشکراون بەسەر 55 وێستگە، لەم هەڵبژاردنەدا 988 هەزار کەس لە عێراق، بۆ یەکەمجار دەنگ دەدەن، کە لە دایکبووی 2001 و 2002 و 2003ن.