رەوتی سەدر: 80 کورسیمان بەدەستهێناوە
موقتەدا سەدر
SNN
بەرەبەیانی ئەمڕۆ نوسینگەی موقتەدا سەدر، رێبەری رەوتی سەدر رایگەیاند، رەوتەکەیان لە هەڵبژاردنەکەی 10ی تشرینی یەکەمدا زیاتر لە 80 کورسی بەدەستهێناوە و ئەو ژمارەیەش پێشبینی زیاتربونی دەکەن، بەو پێیەش رەوتی سەدر دەبێتە گەورەترین فراکسیۆن لە خولی پێنجەمی پەرلەمانی عێراق.
لەلایەکی دیکەوە هەردوو هاوپەیمانی نەسر بەسەرۆکایەتی حەیدەر عەبادی و رەوتی حیکمەی نیشتیمانی بەسەرۆکایەتی عەممار حەکیم بۆ بەشداریکردن لە هەڵبژاردنەکەی 10 تشرینی یەکەم هاوپەیمانییەکیان بەناوی “قوەی دەولە” پێکهێنا، بەگوێرەی ئەنجامە بەراییەکانیش لە هەڵبژاردنەکە ئەو هاوپەیمانییە کەمتر لە 20 کورسی بەدەستهێناوە، لەکاتێکدا لەخولی چوارەمی پەرلەماندا خاوەنی 67 کورسی پەرلەمان بون.
لەخولی چوارەمی پەرلەماندا رەوتی حیکمەی نیشتیمانی بەسەرۆکایەتی عەممار حەکیم خاوەنی 25 کورسی و هاوپەیمانی نەسر بەسەرۆکایەتی حەیدەر عەبادیش خاوەنی 42 کورسی پەرلەمان بون.
دوێنێ هەڵبژاردنی پەرلەمانی عێراق بەڕێوەچوو، تا ئێستا ئەنجامی گشتی هەڵبژاردنەکە رانەگەیەندراوە.
