وەزیری نەوتی عێراقی داوایەک لە وەزیری سامانە سروشتییەکانی هەرێم دەکات

SNN

وەزارەتی نەوتی عێراق ڕایگەیاند، ئیحسان عەبدولجەبار داوای لە کەمال ئەتروشی، وەزیری سامانە سروشتییەکانی هەرێم کردووە هەوڵی زیاتر بدەن لە پێناو زیادکردنی شەفافیەت و ئاڵوگۆڕکردنی زانیارییە تایبەتەکانی چالاکییە نەوتییەکان و داهاتی بەدەستهاتووی نەوتی هەرێم.

وەزارەتی نەوتی عێراق لە ڕاگەیەنراوێکدا ئاماژەی بەوەکردووە، ئیحسان عەبدولجەبار، وەزیری نەوتی عێراق پێشوازی لە کەمال ئەتروشی، وەزیری سامانە سروشتییەکانی هەرێم کرد و تاوتوێی “زیادکردنی هەماهەنگی لەنێوان ناوەند و هەرێم کرا لە بواری نەوتدا.”

ڕاگەیەنراوەکە دەشڵێت، “وەزیری نەوت جەختی لەسەر گرنگی کارکردن بۆ زیاترکردنی شەفافیەت و ئاڵوگۆڕکردنی زانیارییە تایبەتەکانی چالاکییە نەوتییەکان و داهاتی بەدەستهاتووی نەوتی هەرێم کردووە، هەروەها کارکردنی پێکەوەیی لەپێناو وەبەرهێنانی باشتر لە سامانە سروشتییەکان و هایدرۆکاربۆنی لە تەواوی عێراق تاوەکو ببێتە پشتگیری زیاتر بۆ ئابوری نیشتمانی.”

باسی لەوەشکردووە کە وەزیری نەوت ئاماژەی بە “گرنگی زیادکردنی و چڕکردنەوەى پڕۆژەکانی وەبەرهێنان لە غاز و وزەی پاک لە تەواوی پارێزگاکان کردووەتەوە بە مەبەستی زیادکردنی بەرهەمهێنانی و کارکردن بۆ کەمکردنەوەى گازی ژەهراوی وەک هەنگاوێک بۆ پاراستنی ژینگە.”

هەر بەپێی ڕاگەیەنراوەکە، کەمال ئەتروشی ئامادەیی هەرێمی دەربڕیوە بۆ “هەماهەنگی و گفتوگۆ لەگەڵ حکومەتی ناوەند و وەزارەتی نەوت لەپێناو بەرەوپێشبردنی هەماهەنگی هاوبەش بۆ پەرەپێدانی پیشەسازی نەوتی.”