یەکێتی و پارتی کۆدەبنەوە و چەند پرسێک تاوتوێ دەکەن

SNN-عەلی حەمە سەعید

بەمەبەستی گفتوگۆكردن لەبارەی پێكهێنانی هاوپەیمانییەتێكی كوردی و هاوكات خۆئامادەكردنی كورد بۆ پێشهاتەكانی دوای یەكەم كۆبوونەوەی پەرلەمانی نوێی عێراق، وابڕیارە لە چەند رۆژی داهاتوودا شاندێكی مەكتەبی سیاسی پارتی لەگەڵ مەكتەبی سیاسی یەكێتیی نیشتیمانیی كوردستان كۆببنەوە.

بەگوێرەی ئەو زانیارییانەی، كە لە سەرچاوەیەكی مەكتەبی سیاسی یەكێتیی نیشتیمانیی كوردستان بە SNNدراون ئەوەخراوەتەڕوو، لە چەند رۆژی داهاتوودا شاندێكی مەكتەبی سیاسی پارتی دیموكراتی كوردستان لەگەڵ مەكتەبی سیاسی یەكێتیی نیشتیمانیی كوردستان کۆدەبنەوە.

ئاماژەی بەوەشكرد، ناوەڕۆكی كۆبوونەوەكەی هەردوو مەكتەبی سیاسی یەكێتی نشتیمانی كوردستان و پارتی دیموكراتی كوردستان گفتوگۆكردن دەبێت لەسەر پێكهێنانی هاوپەیمانییەتیەكی كورد لە پەرلەمانی عێراق و هەروەها یەكخستنی هەڵوێستی كورد لە بەغدا لەدوای ئەو پێشهاتانەی كە لەدوای یەكەم كۆبوونەوەی ئەنجومەنی نوێنەرانی عێراق دێنە ئاراوە كە وابڕیارە لە 9/1/2022 پەرلەمانی نوێی عێراق كۆببێتەوە.

ئەو سەرچاوەیەی مەكتەبی سیاسی یەكێتی ئەوەشی خستەڕوو، هەر لە كۆبوونەوەكەدا باس لە كاندیدی كورد بۆ سەرۆك كۆماری عیراق دەكرێت، تائێستاش یەكێتی نیشتیمانی كوردستان تاكە كاندیدی بۆ ئەو پۆستە ( د. بەرهەم ساڵح)ەو پارتیش بەفەرمی هیچ داواكارییەكیان ئاراستەی یەكێتی نەكردووە لەبارەی گۆڕینی ئەو كاندیدە و یەكیتیش بۆخۆی خاوەن بڕیارە كێ‌ بكاتە كاندید بۆ وەرگرتنی پۆستی سەرۆككۆمار.