سەرۆکی حکومەت لەگەڵ وەزيری پێشمەرگە و ناوخۆ هەڕەشەی تيرۆريان لەسەر هەرێم تاوتوێکرد

SNN

سەرۆکی حکومەتی هەرێم توندکردن و باشترکردنی رێکارەکانی پاراستنی هەرێميان لە هەڕەشەی تيرۆرستان لەگەڵ وەزيرانی پێشمەرگە و ناوخۆ تاوتوێکرد.

فەرمانگەی ميديا و زانياری حکومەتی هەرێم رايگەياند: ئەمڕۆ یەکشەممە 23 ی کانوونی دووەمی 2022 مەسرور بارزانی سەرۆکی حکومەتی هەرێمی کوردستان لە گەڵ وەزیرانی پێشمەرگە شۆڕش ئیسماعیل و ناوخۆ ڕێبەر ئەحمەد، دوايين گۆڕانکارییەکانی عێراق و سوریا تایبەت بە پەرەسەندنی هەڕەشەکانی تیرۆریستانی داعشی تاووتوێ کرد .

سەرۆکی حکومەت نیگەرانیی خۆی لە زیاتربوونی هێرش و پەلامارەکانی تیرۆریستانی داعش لە عێراق و سوریا دەربڕی و جەختی لە گرنگیی بەهێزترکردنی هێڵەکانی بەرگری و توندترکردنی ڕێکارەکانی پاراستنی هەرێمی کوردستان لە هەڕەشەی تیرۆریستان کردەوە، بۆ ئەم مەبەستەش، پێویستە لە گەڵ حكومەتی فیدراڵی و هێزەکانی هاوپەیمانیی نێودەوڵەتیی، لە پەیوەندی بەهێز و بەردەوامدابن لە پێناو ڕووبەڕووبوونەوەی هەڕەشە و مەترسییەکانی تیرۆریستانی داعش.