نرخی بەنزين هەرزان دەکرێت

SNN

 قایمقامی ھەولێر رايگەياند: بڕیاری ھاوردەکردنی سووتەمەنی و غاز بۆ ئەوەیە کە لەو ڕێگەیەوە بتوانین نرخەکەی دابەزێنین، بۆیە پێویستە ئەو سووتەمەنی و غازەی ھاوردە دەکرێت نرخی لەوەی ئێستا ھەیە هەرزانتر بێت.

نەبەز عەبدولحەمید، قایمقامی ھەولێر، بە ماڵپەڕی فەرمیی پارتی راگەياندووە: ”بڕیار دراوە کە سووتەمەنی و غاز لە عێراق بۆ ھەرێمی کوردستان ھاوردە بکرێت، ئەمەش ڕێگایەکە بۆ ئەوەی نرخی سووتەمەنی و غاز لە ھەرێمی کوردستان لەوەی ئێستا ھەیە هەرزانتر بێت، بۆ ئەوەی ڕێککەوتن بکرێت و بەغدا ڕێگە بدات، پێویستە وەزارەتی سامانە سروشتییەکان ڕێککەوتن لەگەڵ بەغدا بکات ”.

نەبەز عەبدولحەمید وتیشی: ”نرخی سووتەمەنی لە ھەولێر ئێستا دیارە و بەنزین لە 690 دەستپێدەکات و لە عێراق نرخی یەک لیتر بە 450 دینارە و نەوت و غازیش  گرانە، بۆیە پێشبینی دەکەین کە سووتەمەنی و غاز ھاوردە بکرێت و نرخەکەی ھەر ھیچ نەبێت بۆ ھەر لیترێک سووتەمەنی 200 دینار کەمتر بێت و غازیش هەرزانتر بێت،  ئەوەش کارێکی باشە و لە قازانجی ھاووڵاتییاندایە، ھەر بۆیەش ئەو بڕیارە دراوە”.