وەزارەتی كشتوكاڵ: دەتوانين پێداویستی ناوخۆیی مریشك پڕبکەينەوە

SNN-عەلی حەمە سەعید

بەهۆی جێبەجێكردنی ئەو پلانەی كە لەلایەن وەزارەتی كشتوكاڵ و سەرچاوەكانی ئاوی حكومەتی هەرێمەوە جێبەجێكرا و بە گوێرەی ئەو ئامارانەی كە خراونەتەڕوو، هەرێمی كوردستان بە زیادەوە بەشی پێداویستی ناوخۆیی مریشك بەرهەم دەهێنێت كە زیاد لە 300 هەزار تۆن مریشكەو بەشی پێداویستی ناوخۆیش بریتیە لە لە نزیكەی 150 هەزار تۆن مریشك، بەڵام هێشتا بەغدا بەردەوامە لەدروستكردنی گرفت بۆ خاوەن كیڵگە پەلەوەرییەكان.

بە گوێرەی ئەو ئامارانەی كە لە لایەن وەزارەتی كشتوكاڵ و سەرچاوەئاوییەكانی حكومەتی هەرێمەوە بە SNNدراون ئەوەخراوەتەڕوو: هەرێمی كوردستان لە بەرهەمهێنانی گۆشتی مریشكدا گەیشتووەتە خۆبژێوی، بەجۆرێك كە لە هەرێمی كوردستان بڕی 300 هەزار تۆن مریشك لە كێڵگە پەلەوەرییەكان بەرهەم دەهێندرێت، بەڵام پیداویستی ناوخۆیی هەرێمی كوردستان بریتیە لە نزیكەی 150 هەزار تۆن مریشك.

ئاماژە بەوەشكراوە: بەهۆی جێبەجێكردنی ئەو پلانەی كە لە سەرەتای ئەم كابینەیەوە دانرابوو هاوكات جێبەجێكردنی پلانەكە و هاوكاریكردنی خاوەنكێڵگە پەلەوەرییەكان، تواندراوە كە بەرهەمی مریشكی كێلگە پەلەوەرییەكان بگەیەندرێتە ئاستی خۆبژێوی و بڕێكی زۆریشی ڕەوانەی پارێزگاكانی باشوور و ناوەراستی عیراق بكرێت.

هەر لە ئامارەكانی وەزارەتی كشتوكاڵ و سەرچاوەكانی ئاوی حكومەتی هەرێم ئەوەش خراوەتەڕوو: لە ئێستادا لە هەرێمی كوردستان زیاتر لە هەزار و 750 پرۆژەی بەرهەمهێنانی گۆشتی مریشك هەن. هاوكات زیاد لە 912 پرۆژەیش هەن كە خەریكە دروستدەكرێن و زیاد لە 500 پرۆژەیش هەن كە مۆڵەتیان نییە، بە كۆی گشتی پەلەوەرخانە و پڕۆژەكانەوە، ساڵانە دەتوانن نزیكەی 150 ملیۆن مریشك بەرهەمبهێنن.

حسین حەمە كەریم، وتەبێژی وەزارەتی كشتوكاڵی حكومەتی هەریم بە SNNی ڕاگەیاند: ماوەیەكە لەلایەن حكومەتی عێراقییەوە بە دروستكردنی هەندێك بازگە ڕێگریی دەكرێت لە ناردنی بەرهەمی مریشك و هەندێك بەرهمی دیكەی جوتیارانی هەرێم بۆ پارێزگاكانی باشوور و ناوەڕاستی عێراق، بۆیە وابڕیارەكە سەردانی وەزارەتی كشتوكاڵی عێراقی بكەین كاتەكانی رێگریكردن لە هاوردەی ئەو بەرهەمانە رێكبخەین كە لە ناوخۆدا هەن و باج لەسەر بەرهەمی هاوردە دادەنرێت، بە بیانووی بەرهەمی هاوردە رێگری لە بەرهەمی هەرێمی كوردستان نەكرێت كە دەنێردرێتە ناوەڕاست و باشووری عێراق.