شێرکۆ جەودەت: هەناردەکردنی غازی هەرێم تەنيا خەياڵاتە

SNN

ئەندامێکی پەرلەمانی کوردستان دەڵێت: بەپێی ئەو توێژینەوانەی کراون ئێستا هەرێمی کوردستان ناتوانێت غازی سرووشتی هەناردە بکات و بە لای کەمەوە پێنج تاوەکو 10 ساڵی پێدەچێت.

شێرکۆ جەودەت ئەندامی پەرلەمانی کوردستان لە لێدوانێکيدا رايگەياند: رێگرییەکان لەبەردەم هەناردەکردنی غازی هەرێمی کوردستاندا زۆرن کە هەندێکیان پەیوەندییان بە سرووشتی مامەڵەکردن لەگەڵ غازی سرووشتیدا هەیە چونکە غاز وەک نەوت نییە و تەکنەلۆجیا و ئامێری تایبەتی دەوێت.

دەشڵێت “رێگریی دووەم لایەنی سیاسییە کە ئێستا لەگەڵ بەغدا نەوت لە قەیراندایە و ئەوان لەو بارەوە لە دوورترین ئاستی تێگەیشتن و دابڕاندان لەگەڵ هەرێمی کوردستاندا، هەناردەکردنی نەوت و غاز تەنیا بە رێککەوتن لەگەڵ بەغدا دەبێت”.

شێرکۆ جەودەت دەشڵێت “کاتی خۆی ئاشتی هەورامی وتی: بەرهەمهێنانی نەوتی هەرێمی کوردستان لە رۆژێکدا دەگەیەنینە ملیۆنێک بەرمیل. هەروەها باسی ئابووریی سەربەخۆ و ئەوەی کرد کە ئیدی پێوسیتیان بە عێراق نامێنێت، بەڵام بە کردار و واقیع دەرکەوت کە وانییە و تەنیا خەیاڵاتێک بووە. ئەمەی گازی سرووشتیش بە هەمان شێوەیە”.