“لە جەژندا، مەرج بۆ هاتووچۆ لەگەڵ ئێران هەيە”
مەرزی باشماخ
SNN-عەلی حەمە سەعید
بەبۆنی هاتنی جەژنی ڕەمەزان و بەمەبەستی كارئاسانی زیاتر بۆ گەشتیاران لەیەكەم ڕۆژی جەژنی ڕەمەزاندا جموجوڵی بازرگانی لەمەرزی باشماخ راگيرا، وتەبێژی بەڕێوەبەرایەتی كۆمەڵگای نێودەوڵەتی دەروازەی باشماخ ئاماژە بەوەدەكات: هاتووچۆی گەشتیاریش بەمەرجی تەندروستی بەردەوامی دەبێت.
ئیسماعیل عەلی ئاغا، وتەبێژی بەڕێوەبەرایەتی كۆمەڵگای دەروازەی نێودەوڵەتی باشماخ بە SNNی ڕاگەیاند: هاوشێوەی ساڵانی ڕابردوو بۆ ماوەی یەك ڕۆژ و تەنها لەیەكەم ڕۆژی جەژنی ڕەمەزانی پیرۆز دەروازەی نێودەوڵەتی باشماخ بەڕووی جموجوڵی بازرگانیدا داخرا، بەڵام هاتووچۆی گەشتیاری ئاسایی دەبێت.
ئاماژەی بەوەشكرد: بۆدووەم ڕۆژی جەژن جموجوڵی بازرگانی ئاسایی دەبێتەوە، هاوكات هاتوچۆی گەشتیاران لەڕۆژانی جەژندا بەردەوام دەبێت، بەڵام بەمەرجێك هەر هاووڵاتیەك كە دێتە هەرێم و بەپێچەوانەوە دەڕوات دەبێت كارتی ئەلكترۆنی ڤاكسینی كۆرۆنای پێ بێت.
ئەو بەرپرسەی دەروازەی نیچودەولەتی باشماخ ئەوەشی ڕوونكردەوە: ئەگەر هەر هاووڵاتییەك بەمەبەستی گەشتكردن بیەوێت سەردانی ئێران بكات و كارتی ئەلكیترۆنی ڤاكسینی پێنەبێت ئەوا دەبێت پێشوەختە پشكنین بكات، بەڵام ئەو هاووڵاتیانەی كە كارتی ئەلكترۆنیان هەیە بەبێ پشكنین دەتوانن هاتووچۆ بكەن.
