ته‌واونه‌كردنى ڕێگاى كه‌لار سلێمانى سێ وه‌زیرى حكومه‌تى هه‌رێم دێنێته‌ په‌رله‌مان

SNN-عه‌لى حه‌مه‌سه‌عید

له‌به‌رامبه‌ر ته‌واونه‌كردنى ڕێگاى دووسایدى كه‌لار سلێمانى، ژماره‌یه‌ك په‌رله‌مانتار داوا له‌ ده‌سته‌ی سه‌رۆكایه‌تی په‌رله‌مانی هه‌رێمی كوردستان ده‌كه‌ن كێشه‌ی رێگای (كه‌لار- سلێمانی)و ژماره‌یه‌ك رێگا و شه‌قامی ته‌واو نه‌كراو بخاته‌ به‌رنامه‌ی كاره‌وه‌ و لایه‌نه‌ په‌یوه‌ندیداره‌كان ئاماده‌ی دانیشتنه‌كه‌ بن، بۆ ئه‌و مه‌به‌سته‌ش داواى بانگهێشتى سێ وه‌زیرى حكومه‌تى هه‌رێم ده‌كه‌ن.

له‌ یاداشتێكدا كه‌ 37 ئه‌ندامی په‌رله‌مانی هه‌رێمی كوردستان واژوویان كردووه‌ و وێنه‌یه‌كى لاى SNN ئه‌وه‌خراوه‌ته‌روو، داوا ده‌كه‌ن دانیشتنێكی تایبه‌ت به‌ كێشه‌ی رێگای (كه‌لار سلێمانی) و سه‌رجه‌م رێگا و شه‌قامه‌ ته‌واو نه‌كراوه‌كان بخرێته‌ به‌رنامه‌ی كاره‌وه‌

له‌ یاداشته‌كه‌دا په‌رله‌مانتاران داوا ده‌كه‌ن بۆ رونكردنه‌وه‌ و قسه‌كردن له‌سه‌ر كێشه‌كه‌ هه‌ریه‌ك له‌ وه‌زیرانی (ئاوه‌دانكردنه‌وه‌ و نیشته‌جێكردن، دارایی و ئابوری، پلاندانان) بانگێشتی دانیشتنه‌كه‌ بكرێن

ئه‌وه‌ش له‌كاتێكدایه‌كه‌ ماوه‌ی هه‌فته‌یه‌كه‌، ژماره‌یه‌ك له‌ چالاكوانانی گه‌رمیان، دوای ئه‌وه‌ی به‌ پێ گه‌یشتنه‌ سلێمانی، له‌به‌رده‌م نوسینگه‌ی په‌رله‌مان ده‌ستیان به‌ مانگرتن كردووه‌ و داوای ته‌واوكردنی ڕێگای كه‌لار و سلێمانی ده‌كه‌ن.