دەستەی ژينگە هۆشداری دەدات لە بڕينەوەی دار

SNN
لەگەڵ هاتنی وەرزی سەرما و دابەشنەکردنی نەوت بەسەر هاووڵاتياند لەزۆرێک لە ناوچەکانی دەرەوەی شار پەنا بۆ بڕينەوەی دار دەبرێت بەمەبەستی خۆگەرمکردنەوە، لەسەر ئەم بابەتەش دەستەی ژينگە دەڵێت “بڕینەوە و هەڵکێشان و هەردەست درێژییەک بکرێتە سەر دار و نەمام قەدەغەیە و بکەرانی بەپێی یاسا سزا دەدرێن”.

ئەحمەد مەولود، بەڕێوەبەری نوسینگەی سەرۆكی دەستەی ژینگەی هەرێم لە پەیامێکدا کە راگەیاندنی دەستەکە بڵاویکردووەتەوە باس لە ڕۆڵی دەستەی ژينگە لە پاراستن و زیادکردنی رێژەی سەوزایی دەکات.

هەروەها دەڵێت “لە یاسای پاراستن و چاککردنی ژینگە کە لەماددەی (٣١)ی یاسای ژمارە(٨)ی ساڵی ۲۰۰٨ بە روونی باس لەوە دەکات:
بڕینەوەو هەڵکێشان و هەردەست درێژییەک بکرێتە سەر دارو نەمام قەدەغەیەو بکەرانی بەپێی یاسا سزا دەدرێن”.

ئاماژەی بەوەشکردووە: ئەو پرۆژانەی بۆ مەبەستی وەرگرتنی رەزامەندی ژینگەیی سەردانی دەستەی ژینگەو فەرمانگەکانی دەکەن، بەپێی رێنمایی ژمارە(٣)ی ساڵی ۲۰۲۲ پێویستە پرۆژە گەورەکان لەکۆی گشتی رووبەرەکەی ٢٥٪ ی بکرێتە سەوزایی.

راشيگەياندووە: پرۆژەی لەبری سەوزکردن، ئەو پرۆژانەی پێش یاسا و رێنماییەکانی ژینگە دروست بوون و لە ئێستادا بۆ هەر مامەڵەیەک بێنە دەستە و فەرمانگەکانی، دەبێت ٢٥٪ سەوزایی لە شوێنێکی گشتی ئەنجام بدات، وەکو دروستکردنی پارکێک یان سەوزکردنی شوێنێکی گشتی.