سۆزان مەنسور: هەوڵ دەدەین پێش بودجە پڕۆژەیاسای بەپارێزگابوونی هەڵەبجە تێپەڕێنین

SNN-عەلی حەمە سەعید

وتەبێژی فراكسیۆنی یەكێتی لە پەرلەمانی عێراقی ئاماژە بەوەدەكات دوای ئەوەی هەفتەی ڕابردوو خوێندنەوەی یەكەم بۆ پرۆژەیاسای بە پارێزگاكردنی هەڵەبجە كرا، هەموو هەوڵێك دەدەین پێش تێپەڕاندنی پرۆژەیاسای بودجەی گشتی بتوانین پرۆژەیاسایی بە پارێزگاكردنی هەڵەبجە خوێندنەوەی دووەمی بۆ بكرێت و تێپەڕێنین، جەختیش دەكاتەوە بەئەركی سەرشانی خۆمانی دەزانین هەنگاوەكانی بە پارێزگاكردنی هەڵەبجە تەواو بكەین.

سۆزان مەنسور، وتەبێژی فراكسیۆنی یەكێتی لە ئەنجومەنی نوێنەرانی عیراق بە SNNی ڕاگەیاند: یەكێتی لە هەوڵی دروستكردنی كۆدەنگیدایە لەگەڵ بەشێك لە لایەنەكان، بۆ تێپەڕ‌اندنی پڕ‌ۆژەیاسای بەپارێزگابوونی هەڵەبجە، بۆ ئەو مەبەستەش هەوڵدەدەین پێش پەسەندكردنی پڕ‌ۆژەیاسای بودجەی گشتی عێراق لە پرۆژەیاسای بەپارێزگاكردنی هەڵەبجە تێبپەڕ‌ێنین، تاوەكو بەشە بودجەی هەڵەبجە وەك پارێزگا جێگیربكرێت، پێشتریش فراكسیۆنی یەكێتیی نیشتمانیی كوردستان داوای بەشە بودجەی تایبەتی بۆ پارێزگای هەڵەبجە وەك شارێكی قوربانیدەر كردووە.

ئاماژەی بەوەشكرد، پڕ‌ۆژەیاسای بەپارێزگابوونی هەڵەبجە مافی بودجەی تایبەت بۆ هەڵەبجە دابیندەكات، جگەلەوەی لەسەر ئاستی نێودەوڵەتیش خزمەت بە كەیسی كیمیابارانی شارەكە دەكات و هاوكاری نێودەوڵەتی پێشكەش دەكرێت، هاوكات ئەگەر یاساكە پەسەند بكرێت زووتر قەرەبووی زیانلێكەوتوان دەكرێتەوە ودەتوانرێت لەسەر ئاستی نێودەوڵەتیش هەڵەبجە بە شارێكی كارەساتبار  بناسێنرێت.

وتەبێژەكەی فراكسیۆنی یەكێتی لە پەرلەمانی عێراقی ئەوەشی خستەڕوو، بەگوێرەی پرۆژەیاسای بەپارێزگاكردنی هەڵەبجە لەدوای خوێندنەوەی دووەم بۆ پرۆژەیاساكە و پەسەندكردنی لەپەرلەمان، ئەو كات هەڵەبجە دەبێت 19 هەمین پارێزگای عێراق و هاوكات بەپشت بەستن بە بەندی یەكەم لە مادەی 61ی دەستووری  عێراق، دەبێت ئەنجومەنی وەزیرانی هەرێمی كوردستان بەهەماهەنگی لەگەڵ وەزارەتی پلاندانانی عێراق سنوور و یەكە ئیدارییەكانی پارێزگاكە دیاریی بكات.