شەپۆلێکی تاوەباران ناوچەکە دەگرێتەوە و لە کۆتایی مانگدا بارانی پەڵە دەبارێت

SNN-

شاڵاو هیدایەت، شارەزای کەشناسی، نوێترین پێشبینییەکانی سەبارەت بە ڕەوشی کەشوهەوای ناوچەکە ڕاگەیاند و ئاماژەی بەوە کرد تاوەکو ئێوارەی ئەمڕۆ هەینی، حاڵەتێکی تاوەباران و هەورەبروسکە بە شێوەی پچڕپچڕ زۆربەی ناوچەکان دەگرێتەوە و کۆتایی ئەم مانگەش لە زۆربەی ناوچەکان پەڵە دەدات.

کۆتایی شەپۆلەکە

بەپێی پێشبینییەکانی ئەو شارەزایە، حاڵەتەکە بە گشتی لاوازە و بڕێکی کەم بارانی پێوەیە، بەڵام لە هەندێک شوێن ئەگەری هەیە بڕەکەی زیاتر بێت و لەگەڵ تاوەکاندا خێرایی با زیاد بکات. ئەم شەپۆلە لە شەوی هەینیدا کۆتایی پێدێت و بۆ ڕۆژانی یەکشەممە و دووشەممە کەشوهەوا سەقامگیر دەبێتەوە.

دوو شەپۆلی دیکە هەیە

سەبارەت بە هەفتەی داهاتوو، شاڵاو هیدایەت ڕایگەیاند لە نێوان 12 بۆ 17ی ئەم مانگەدا، دوو شەپۆلی دیکەی بارانبارین و هەورەبروسکە ناوچەکە دەگرنەوە، کە شەپۆلی دووەمیان ڕێژە و کاریگەریی زیاتر دەبێت.

بارانی پەڵە

لەبارەی پلەکانی گەرما و بارانی پەڵەوە، وتیشی کە پلەکانی گەرما تاوەکو ناوەڕاستی مانگ بە جێگیری دەمێننەوە و لە دوای ناوەڕاستی مانگەوە شەپۆلێکی نوێی دابەزینی پلەکانی گەرما دەستپێدەکات. هەروەها پێشبینی دەکرێت لە هەفتەی کۆتایی ئەم مانگە تاوەکو هەفتەی سەرەتای مانگی داهاتوو، بارانی پەڵە بە گشتی سەرجەم ناوچەکان بگرێتەوە.